إسماعيل ياسين في السكة الحديد: أنا بيني وبين الجنان فركة كعب

طب وشرف عمي اللى اشترى التروماي وماركبوش بتاتا البتة.. أنا ما عارف ليه حال السكة الحديد ما بينعدلش بتاتا كده.. الحاجة الوحيدة اللي بتتغير في المرفق المهبب ده هي تمن التذكرة وبس.. كل وزير ييجى يقولنا عايزين نطور السكة الحديد.. قوم إيه يزود تمن التذكرة ويفضل العجل في طينه زى ماهو.. عربيات مستهلكة من أيام الهكسوس.. دورات مياه لا تصلح للاستخدام الحيوانى.. بائعون متجولون واحد نازل وواحد طالع من القاهرة لأسوان وهاتك يا زعيق.. إشى بيبيع مناديل وإشى بيبيع هدايا وإشى بيبع الهوا في أزايز.. وكله على دماغ الراكب المسكين اللى بيسافر 12 ساعة على كرسى متهالك بدون أن يغمض له رمش.. طب هو الرمش بيغمض برضه؟!.. خليها دون أن تغمض له عين.
والغريب والمستغرب أن هيئة السكك الحديدية عاملة مسابقة لأجمل قطار من حيث مستوى النظافة خلال عام كامل.. طيب هيجيب النظافة منين ياعالم لمدة سنة كاملة.. دا الجواب باين من عنوانه أهه.. كل سنة زيادة في الأجرة تصاحبها زيادة في سوء الخدمة.. مع أن القطارات دى للغلابة ومحدودى الدخل
عموما أنا سأسكت أهه.. وهقفل خشمى ولن أقول لكم سوى "متشنكر".. علشان أنا بينى وبين الجنان فركة كعب
كل وزير جديد للنقل ييجى يعمل فيها حٍدق وفٍتٍك وهاتك يا تصريحات لغاية ما تنتهى مدته، وييحى اللى بعده واللى بعد بعده وأهو كله تضييع وقت، وتضييع أرواح الغلابة في حوادث المزلقانات والذي منه
أنا خلاص هغصب على نفسى وأسد مناخيرى وأعمل نفسى من بنها وأدفع الأجرة عدا ونقدا.. ده إذا لقيت تذكرة في الشباك أصلا.. حاكم التذاكر كلها بتتباع في السوق السودة بضعف تمنها.. إلهى يسود عيشة اللى كان السبب في هذا.. أما أنت يا سعادة وزير النقل فخليك زى ما أنت وزى اللى قبلك واتكل على الله وحط في كرشك بطيخة صيفى.. واستمر في رفع كفاءة التذكرة على المواطن يا حلو أنت يا حلو.. وماتشلش هم كفاءة القطارات.. ويلا بقى.. سلامو عليكووووووو.