شباب "فيس بوك": الثورة اتعملت عشان جوز جنيهات

وبدت على "حدوقه" مظاهر العجب وهو يفرك فى رأسه متسائلاً: هى الثورة اتعملت ليه ؟ اتعملت ليه ؟ فكر معايا يا محمد، فكر معايا يا مينا، فكرى معايا يا بهية، مممممم وجدتها، الثوووورة اتعملت عشان جوز جنيهات !! إيدكم بقى على مليون جنيه هدية.
أثار تصريح "أشرف العربي" وزير التعاون والتخطيط الدولى بأن 8 جنيهات تكفى المواطن المصرى فى اليوم، المئات من تعليقات شباب "فيس بوك" الساخرة قائلين " عثمان وزير تخطيط مبارك من حوالى 5 سنين قال المصرى يكفيه 6 جنيه فى اليوم، والنهاردة وزير تخطيط مرسى بيقول 8 جنيه كفاية للفرد فى اليوم، عرفتوا بقى الثوره اتعملت ليه ؟ الثورة اتعملت عشان جوز جنيهات !!!، "فيتو كافيه" رصدت تعليقات الشباب على موقع التواصل الاجتماعى "فيس بوك"...
أحمد فاروق : وزير التخطيط: المواطن يكفيه 8 جنيهات يومياً !
يعنى هتركب أتوبيس وانت رايح شغلك الصبح ب 0.5 جنيه، هتفطر طبق فول وقرصين طعمية ورغيفين ب 2 جنيه، هتتغدى سندوتش بطاطس ب 2 جنيه، هتتعشى ببيضة ورغيف ب 1.5 جنيه، هتشترى كارت شحن ب 1.5 جنيه، هتروح بأتوبيس ب0.5 جنيه، يبقى المجموع 8 جنيه، إنتم هتنهبوا ولا هتنهبوا ؟!.
ماجد حسين : وزير التخطيط الحالى يؤكد أن 8 جنيه مصرى تكفى المواطن يوميا !! .. أعتقد أن الشعب سيعلن موافقته إذا كان راتب الوزير ورئيسه 240 جنيه شهريا !.
آيات عثمان : باشا باشا طب ندفعلك 8 جنيه فى اليوم وانت تصرف علينا وساعتها نشوف بقى.
معتز مجدى : 8 جنيهات تكفى المواطن فى اليوم، يا صفايح النهضة السايحة يا براميل الاستقرار النايحة.
وليد فواز : عمرنا ما فلسنا من الفساد بس هنفلس من كتر النهضة.
محمد الصاوى : لا تخرج قبل أن تقول سبحان الله، وزير التخطيط بيقولك 8 جنيه تكفى المواطن فى اليوم ، يعنى فى الشهر 240 جنيه، أمال إحنا قومنا بثورة ليه ؟ مش عشان نعيش بكرامة وما نبقاش محتاجين، ولا عشان نموت بالبطىء وبحسرتنا على الثورة والشباب إللى ماتوا.
آية مختار : أنا إديت البت سنية 8 جنيه تشترى بيهم 3 رطل لحمة، و20 بيضة، وتدفع أجرة البيت طمعت فى الباقى وطفشت.
نوران محمد : طب الحمد لله، نعمل 4 ثورات كمان عشان نوصل لعشرة جنيه.