شباب "فيس بوك" يطالبون بتولى باسم عودة جميع الوزارات

باسم عودة نجم صفحات الإخوان، والورقة الرابحة التى تلجأ إليها لجان الإخوان الإلكترونية، كان محل خلاف عبر صفحات "فيس بوك"، الوزير الأنشط فى وزارة قنديل متهم باستغلال وزارته فى الدعاية لحزب الحرية والعدالة، الشباب طالبوا ساخرين بأن يتولى عودة جميع الوزارات، "فيتو كافيه" رصدت مناقشات الشباب عبر صفحة "أنا إخوان أنا مقطف بودان"..
صفحة "أنا إخوان أنا مقطف بودان": المهم إنك تيجى تتكلم مع واحد من دول تقوله: هشام قنديل دا فاشل، يقولك: بس باسم عودة ناجح، تقوله: وزير الإعلام بيقول ألفاظ متتقالش، يقولك: بس باسم عودة مؤدب ومحترم، تقوله: دا وزير العدل استقال اعتراضًا على سياسة مرسى، يقولك: بس باسم عودة خير منفذ لسياسة مرسى!!
فونيكس ستارت: خلاص يمَشّوا كل الوزراء ويمَسّكوا باسم عودة كل الوزارات، ما هى حاجة تقرف.
شمس الشرق: باسم عودة اللى بياخد من مال الشعب علشان يدى الشعب بس فى أكياس الحرية والعدالة ... هو كدة يبقى كويس؟؟
مصطفى الأنصارى: والله لازم الوزارة كلها تكون غير تابعة لحزب أو لجماعة، يعنى من الآخر مالوش انتماء إلا لمصر والشعب.
عمرو إبراهيم: حتى لو باسم كويس فهذا يؤكد أن الإخوان فاشلون، ومنهم القليل هو الناجح.