نص تحقيقات النيابة في مقتل شاب على يد ضابط السلام

قرر المستشار محمد عبده، رئيس محكمة جنح مستأنف مدينة نصر، إخلاء سبيل الضابط محمد فؤاد، معاون مباحث قسم شرطة السلام، المتهم بقتل شاب وإصابة آخر بمنطقة النهضة أثناء القبض على متهم بحيازة مواد مخدرة، بكفالة 5 آلاف جنيه.
وتنفرد "فيتو" بنشر نص تحقيقات نيابة شرق القاهرة الكلية في الواقعة، وجاء فيها:
أقوال الضباط المتهمين
اسمك وسنك؟
ج: اسمى محمد عادل محمود فؤاد، 27 سنة نقيب شرطة بقسم السلام ثان.
س: ما قولك فيما هو منسوب إليك من أنك متهم بصفتك موظف عمومي باستعمال القسوة اعتمادا على وظيفتك بان قمت بإطلاق أعيرة نارية مما أسفر عن وفاة شاب وإصابة آخر؟
ج: محصلش، الأهالي اللى اعتدت عليا أنا وباقي القوة.
س: ما تفصيلات ما حدث؟
ج: اللى حصل أنه في يوم 4 يونيو 2017، نحو الساعة 9 بالليل كنت مع قوة أمنية بميكروباص، بنتابع الحالة الأمنية في المنطقة، النقيب أسامة محمد شاف مقروصة قاعد على القهوة وبيرمى حاجة من ايده شك أنها حشيش، نزلنا نضبط المتهم، وفجاة لقينا الأهالي اتلمت علينا وبدءوا فينا ضرب وحاولوا منعنا من ضبط المتهم وسمعنا طلقة خرطوش منعرفش مصدرها.
س:اسمك وسنك وجهة عملك؟
ج: اسمي أسامة محمد ابرهيم 27 سنة وأعمل نقيب شرطة بمباحث قسم شرطة السلام ثان.
س: ما قولك فيما هو منسوب إليك من أنك متهم بصفتك موظف عمومي باستعمال القسوة مع معتز بالله محمد فاروق اعتمادا على وظيفتك بأن قمت بالتعدي عليه بالضرب محدثا إصابات الموصوفة بتقرير الطب الشرعي؟
ج: محصلش ده هو اللي اعتدى عليا أنا والقوة بالضرب في مكان الواقعة.
س: ما تفصيلات ما حدث؟
ج: اللى حصل أنه في يوم 4 يونيو 2017، نحو الساعة 9 بالليل كنت مع النقيب محمد فؤاد، وأمناء الشرطة مصطفى بسيوني وتامر رمضان وطارق بنداري، وكان معانا عربية ميكروباص وإحنا بنلف في شارع السنترال وانا راكب العربية في الكرسي اللي خلف السواق شفت محمود أحمد السيد عبد الهادي وشهرته (مقروصة) قاعد على قهوة الحبايب وبيبص في ايده وكان فيها حشيش فنزلت بسرعة انا والأمين تامر، وأول لما وصلت ليه، وهو مش واخد باله مني مسكت ايده والناس اللي كانت في القوة كانت شايفة أنه كان معاه حشيش وانا بشده على الميكروباص لقيت جمبة واحد اسمة معتز منعني وقال ليا مش هتطلع بيه من هنا، وانا بشدة بيعافر معايا وعاوز يهرب، ولقيت معتز بيضربني بايده في ظهري من الخلف ومرة واحدة لقيت الناس اتلمت والدنيا ولعت علينا والضرب اشتغل علينا من كل ناحية.
ودخلت "هاجر" اخت معتز، والناس اللي كانت في القهوة اتلموا علينا وانا كل همي الولد اللي مسكته والحرز وأحافظ على السلاح بتاعي، والأمناء بداوا يساعدوني أخد المتهم واحطة في العربية فلقيت هاجر بدات تتعدي عليا بالضرب والسب ومسكتني من رقبتي ومن أيدي علشان تهرب محمود، والنقيب محمد فؤاد حاول يدافع عني وحط جسمه قدامي علشان يشيل عني الضرب فهاجر مسكت فيه، وهما فضلوا يشدوا في بنطلون محمد فؤاد والحزام بتاعه اتفك، فمسكه وفضل يهوش بية على الناس علشان نطلع من تحت ايديهم وكان الطبنجة بتاعته هتقع منه علشان البنطلون مفهوش حزام فطلع السلاح الميري وبيهوش بيه على الناس، وفجاة سمعنا طلقة خرطوش فكل الناس واحنا كمان وطينا ودخلت المتهم جوة العربية، وبدات هاجر ومعتز والناس كلها تكسر في الميكروباص ومحمد فؤاد وهو بيهوش بالسلاح هاجر مسكت السلاح الميري هي ومعتز وخرجت 3 أو 4 طلقات وبعدين ركبنا العربية ومشينا بسرعة.
المتهم بحيازة مواد مخدرة
س: اسمك وسنك وعنوانك وجهة عملك؟
ج: اسمي محمود أحمد السيد 25 سنة عامل بمحل قطع غيار سيارات.
س: ما قولك فيما هو منسوب اليك من انك متهم بإحراز جوهر مخدر الحشيش بقصد الاتجار بدون ترخيص، والتعدي على النقيب محمد عادل محمود فؤاد والنقيب أسامة محمد ابرهيم واستعمال القوة والعنف معهم بصفتهم موظفين عموميين؟
ج: محصلش.
س: ما الذي حدث وما هي ظروف ضبطك وإحضارك؟
ج: اللي حصل انا كنت قاعد على قهوة جنب بيت معتز وكان معانا ناس أصحابنا علشان نتفرج على مباراة الأهلي وقاعدين عادي لقيت ميكروباص وقف ونزل منه ضابط شرطة وقال ليا أنت بترمي اية في الأرض وطلع كشاف التليفون، وقعد يدور في الأرض ملقيش حاجة فقام مفتشني ملقيش حاجة معايا وكان عاوز يخدني يركبني ميكروباص،فمعتز بيقول ليه أنت هتاخده ليه فضربه في صدره، وحاول يدخلني العربية وجة ورايا واختة جت يكلموا الضابط فقام ضربهم وزقهم وشتمهم والضابط محمد فؤاد نزل من العربية وساعتها الناس اتلمت فطلع السلاح بتاعه وضرب نار على الناس اللي واقفة علشان يبعدهم عن العربية وضرب 3 طلقات منهم واحدة في الهواء وواحدة جات في تامر، والثانية جات في واحد اسمه سيف والضابط لما شاف العيال وقعت خد الأمناء وجري بيهم بسرعة وانا كنت في الميكروباص، ودخلت معاهم القسم وفي الفجر جات النيابة وعرفت اللي حصل وان في واحد مات.
تقرير الطب الشرعي
وكشف تقرير الطب الشرعى لجثة المجنى عليه سيف مسعد جمعة، أن الوفاة حدثت نتيجة اصابته بطلقة نارية حيوية حديثة من عيار 9 مم اطلق من سلاح معد لإطلاق النار، ومن مسافة قريبة، واستقر بصدره.
وأضاف التقرير أن الإطلاق كان بشكل أساسي من الامام للخلف، وان الطلقة احدثت انفاق تهتكية وانزفة غزيرة بالقلب والرئة اليسري مما ادي إلى حدوث صدمة نزيفية غير مرتجعة، ادت إلى الوفاة
وكانت نيابة شرق القاهرة الكلية، بإشراف المستشار إبراهيم صالح المحامي العام الأول، وبرئاسة المستشار إسلام الجوهري رئيس نيابة الحوادث، أمرت بإخلاء سبيل باقي القوة الأمنية، المكونة من ضابط آخر، و3 أمناء شرطة من قوة مباحث قسم شرطة السلام ثان، في واقعة مقتل شاب، وإصابة آخر، أثناء القبض على مشتبه به، بكفالة مالية قدرها ألفي جنيه، لكل منهم.