ننشر نص التحقيقات مع المتهم الرئيسى بالشروع فى قتل رئيس مركز شرطة الواحات البحرية..النيابة تواجهه باستعمال القوة والعنف مع موظفين عموميين..والمتهم يرد:"محصلش"..وضيف أطلق النار على نفسه عن هجوم الشرطة

ينشر "اليوم السابع" نص التحقيقات التى باشرتها نيابة أكتوبر ثانى مع المتهم الرئيسى يدعى "عبد الحليم . أ . ع" ويعمل خفيرا خصوصيا، لضلوعه و13 آخرين بالشروع فى قتل رئيس مركز شرطة الواحات البحرية فى القضية رقم 129 لسنة 2014 الواحات.
بدأت التحقيقات فى تمام الساعة العاشرة صباحا الموافق 12 مايو من العام الماضى، وفتح وكيل نيابة أكتوبر ثانى الجزئية، محضرا للتحقيق أثبت فيه أن المتهم حضر إلى غرفة التحقيق يرتدى "بليزر" زيتى اللون، أسفله جلباب بنى اللون، أسفله سروال بنى اللون، ولا ينتعل ثمة أحذية، وقام بمناظرته لبيان وجود أى إصابات به من عدمه وتبين عدم وجود إصابات ظاهرة بعموم جسده.
وتلى المحقق الاتهامات المنسوبة للمتهم الرئيسى بالشروع فى قتل رئيس مركز شرطة الواحات البحرية، البالغ عددها 6 وهى: (الشروع فى قتل الرائد محمد عبد الشكور رئيس مباحث الواحات، الشروع فى سرقة إحدى المزارع، إحراز أسلحة نارية "بنادق آلية"، إحراز ذخائر تستخدم على الأسلحة سالفة الذكر، استعمال القوة والعنف مع موظفين عموميين، ممارسة أعمال البلطجة).
وأبلغه المحقق أنه الآن يقف أمام النيابة العامة وهى الجهة التى تتولى التحقيق معه، فأنكر كافة الاتهامات الموجهة إليه، وبسؤاله شفاهة عما إذا كان لديه شهود نفى أو دفاع يحضر معه إجراءات التحقيق أجاب على الشق الأول بالنفى، وعلى الشق الثانى بحضور محمد نور فرحات للدفاع عنه.
والى نص التحقيقات:-
س: ما قولك فيما هو منسوب إليك من أنك متهم وآخرون فى الشروع فى قتل الرائد محمد عبد الشكور رئيس مباحث الواحات البحرية، وذلك بأن أشهرتم فى وجهه أسلحة نارية عبارة عن بنادق آلية مطلقين اتجاهه أعيرة نارية محدثين به الإصابات المبينة بتقرير الطب الشرعى قاصدين من ذلك إزهاق روحه؟
ج: محصلش واللى ضرب النار "ضيف" والناس اللى معاه بالبنادق.
س: ما قولك فيما هو منسوب إليك من أنك متهم بالشروع فى سرقة المنقولات المبينة بالتحقيقات والمملوكة لعصام محمد وأحمد يحيى وسمير محمد أبو غنيمة وحازم عامر وكان ذلك بالإكراه تحت تهديد السلاح بالطريق العام؟
ج: محصلش وأنا ما كنتش بسرق حاجة.
س: ما قولك فيما هو منسوب إليك من أنك متهم وآخرون بإحراز أسلحة نارية "بنادق آلية" مما لا يجوز حيازتها أو أحراز الترخيص بحيازتها؟
ج: محصلش والبنادق بتاعت ضيف والرجالة كمان تبعه.
س: ما قولك فيما هو منسوب إليك من أنك متهم بإحراز ذخائر مما تستخدم على الأسلحة سالفة البيان بدون ترخيص؟
ج: محصلش.
س: ما قولك فيما هو منسوب إليك من أنك متهم وآخرون باستعمال القوة والعنف مع موظفين عموميين وهم مأمورى الضبط القضائى أفراد قسم شرطة الواحات، وذلك لمنعهم من أداء عملهم ونتج عن ذلك إصابة المجنى عليه الرائد محمد عبد الشكور؟
ج: محصلش واللى ضرب نار هو "ضيف" واللى معاه.
س: ما قولك فيما هو منسوب إليك من أنك متهم وآخرون بممارسة أعمال البلطجة وذلك باستعراض القوة وترويع المواطنين وتهديد أمنهم لسلب أموالهم؟
ج: محصلش.
س: ما الذى حدث إذا وما هى ظروف ضبطك وعرضك علينا؟
ج: اللى حصل إنى كنت بشتغل خفير فى وادى النطرون وسبت الشغل، ومن حوالى أسبوع كلمت ضيف عبد الونيس اللى ماسك غفرة من الغفرات فى الواحات، وسألته على شغل قالى تعالى وجيت لضيف، وضيف شغال معاه أكتر من 15 خفيرا، وجايبلهم 4 بنادق يحرسوا بها الأراضى اللى بياخدوا عليها الغفرة، واشتغلت معاه 5 أيام، وأول إمبارح جالوا سمير أبو غنيمة والناس اللى معاه، وهما قاعدين الحكومة جات ولقيت ضيف طلع الآلى بتاعه وضرب نار على الحكومة، وعرفت إنه وقع ضابط، وكان الناس اللى معاه أخوه عبد الحميد بيضرب نار كمان وناس تانية مأخدتش بالى منها، وأول ما ضرب النار اشتغل والضابط أتعور قمت جارى جوه البيت اللى فيه معيشتنا، والمأمور حسام جه مسكنى من جوه البيت ومكنش معايه حاجة، ولقى البندقية جنب البيت، وفتش العربية بتاعت "ضيف" الشروكى لقى فيها ذخيرة راح مسكنى وطلع بيا على القسم، وتانى يوم عرفت فى الحجز من "قنديل" إن "ضيف" كان واقف معاه وكانوا هيموتوا راح هو والرجاله سلموا نفسهم بالسلاح وده اللى حصل.
س: متى حدث ذلك؟
ج: الكلام دا حصل أول إمبارح بعد صلاة المغرب فى منطقة الحيز بالواحات.
س: وما سبب تواجدك بالمكان والزمان سالف الذكر؟
ج: أنا كنت مع "ضيف" فى المزرعة بتاعت "محمد طه" بنحرسها فى الخفرة.
س: ومن كان برفقتك آنذاك؟
ج: "عبد الحليم. إ. ع"، و"على. إ. م"، و"أحمد. ن. إ"، و"وليد. ع. ص ر"، و"جمعة. ع. م"، و"يحيى. إ. ع"، و"عبد الحميد. ع. ض"، و"محمد. ن. م"، و"حمودة. ح. ح"، و"ضيف الله. ع. س"، و"صابر. ع. ص"، و"أشرف. ف. ع"، و"بريك. م. ع".
س: وما علاقتك بسالفى الذكر؟
ج: أنا بشتغل مع "ضيف" والناس دول بيشتغلوا معاه و"سمير" والناس اللى معاه كانوا جايين لضيف لكن أنا معرفهمش.
س: وما هى طبيعة عملك؟
ج: أنا بشتغل خفير.
س: وما هى طبيعة عمل سالفى الذكر؟
ج: كلنا بنشتغل خفر مع ضيف وسمير واللى معاه معرفش بيشتغلوا ايه.
س: وهل تحوزوا ثمة أسلحة أثناء عملكم؟
ج: هو ضيف عنده 4 بنادق آلية بيدى الرجالة بيدى الرجالة بتاعته بنادق منهم عشان يحرسوا بيها الأرض لكن أنا مخدتش سلاح لإنى لسه جديد معاهم.
س: وما هى كيفية ممارسة المدعو ضيف ورجالته وإنت من عملكم؟
ج: هو ضيف بيروح لأصحاب الأراضى يشوفهم عوزين حراسة ولا لأ ولو عوزين بناخد منه مخ أى فلوس ونحرس الأرض ولو مش عوزين ممكن ضيف يزُأ عليهم أهل البلد او يتخانق معاهم.
س: من أطلق الأعيرة النارية وقت حضور رجال الشرطة؟
ج: هو ضيف أول واحد ضرب نار وبعد كده الرجالة بتاعته ضربوا بعد كده.
س: وما سبب قيامهم بذلك؟
ج: معرفش.
س: ومن أى اتجاه تم إطلاق النار؟
ج: ضربوا ناحية الشرطة.
س: وما هو مستوى إطلاق النار تحديدا؟
ج: أنا معرفش لإن ساعة ضرب النار بس عرفت إن ضيف هو أول واحد ضرب وسمعت صوت البندقية بتاعته بتضرب.
س: وهل شاهدت بنفسك عملية ضرب النار؟
ج: أنا فى الأول ما شفتش بس لما ضيف والرجالة جريوا شفت الشرطة بتضرب نار.
س: وكيف تمكن ضيف ومن معه من الهرب؟
ج: هو ساعة الضرب ضيف والرجالة ركبوا عربة اتنين كبينه وهربوا.
س: وما سبب عدم هروبك معهم؟
ج: لإنى كنت جوه البيت وقت ضرب النار.
س: ومن محدث إصابة المجنى عليه الرائد محمد عبد الشكور؟
ج: معرفش.
س: وما هى كيفية ضبط باقى المتهمين المضبوطين؟
ج: أنا عرفت لما رجعت للقسم ان ضيف ورجالته هربوا فى الجبل والحكومة دورت عليهم ولما الرجالة تعبوا من العطش سلموا نفسهم ووليد وأشرف سلموا نفسهم بالسلاح بتاعهم وضيف وقنديل فضلوا فى الآخر وضيف موت نفسه ومرضيش يسلم نفسه للحكومة.
س: وكيف نمى إلى علمك ذلك؟
ج: لإن قنديل قالنا فى الحجز وعرفت من المأمور.
س: وما هى المضبوطات التى تم ضبطها حال ضبطك؟
ج: هو فتنشنى ملقاش معاية أى حاجة بس لقى بندقية آلى جنب البيت ولقى ذخيرة فى العربية الشروكى بتاعت ضيف.
س: ومن القائم بضبط هذه الأشياء؟
ج: المأمور حسام.
س: ماصلتك بالمضبوطات المعروضة عليك الآن؟
ج: أنا أعرف إن البندقية اللى عرضها على فى الأول بتاعة ضيف وكانت فى العربية الشروكى والمأمور هو اللى طلعها من العربية والذخيرة بتاعت ضيف والأربع طلقات دول معرفش عنهم حاجة.
س: هل من ثمة علاقة أو خلافات بينك وبين العقيد حسام الدوجلى والرائد محمد عبد الشكور؟
ج: لأ.
س: هل لديك أقوال أخرى؟
ج: لا .
موضوعات متعلقة..
"جنايات الجيزة" تقضى ببراءة 14 متهماً بالشروع فى قتل رئيس شرطة الواحات