«هيومن رايتس» إخوانية ونائبنا حسم القضية

نائبنا دا مالوش حل.. قرر أن يدافع عن حقوق الإنسان في مصر.. لكن بطريقته الخاصة.. ووضع منظمة «هيومن رايتس ووتش» في مأزق وأحرجها في حجر داره.. أي والله في حجر داره هو.. ووسط أبناء عمومته ومريديه بالدائرة بتاعتنا.
وأنا بقى جمعتكم النهارده يا أهالي دائرتنا الكرام علشان أقولكم أن نائبنا مسخر أم المنظمة ومسح بيها الأرض وأخد حق مصر كلها وهو حاطط رجل على رجل في دوار سيادته.
الباشا النائب بتاعنا راجع من المصيف بقى علشان يوقف «هيومن رايتس» عند حدها.. وبعد وجبة العشاء السمينة قوى من بواقى لحمة العيد جلس وسط معازيمه من حبايبنا في الدايرة وأخذ يشرح لهم كيف تجنت منظمة رايتس على المسئولين عن سجون مصر، وقالت في تقريرها إن المساجين في مصر قال إيه بيتعرضوا للتعذيب.. نائبنا بيقول إن سجون مصر 5 نجوم.. لكن المنظمة دى أصلا إخوانية، ويقوم بتمويلها خيرت الشاطر من داخل سجنه.
وضع نائبنا رجلا على الأخرى وأقسم أن خيرت الشاطر ده أصلا عايش في نعيم داخل السجن وبيتدلع آخر دلع.. وقال نائبنا بالفم المليان «ماهو يا إما أنا أو منظمة رايتس في البلد دى».. المنظمة يا سادة بتحرض المجتمع الدولى ضد مصر.. عايزة الناس اللى في العالم تكرهنا.. أنا عارفها كويس وعلى رأى المثل الشعبى بتاعنا «اللى ربى خيرا من اللى اشترى».. وأضاف النائب: طب دا إحنا عندنا أحلى حقوق إنسان في العالم.. أمريكا بجلالة قدرها اتعلمت مننا إزاى تعامل البنى آدمين!
طب يا أهالي دائرتنا الكرام.. يعنى نائبنا دا هيفضل يسرح بينا كدا لغاية إمتى؟!.. دورة البرلمان قاربت على الانتهاء ولم نأخذ منه غير الرغى والفتى فيما لا يثمن ولا يغنى من جوع.. النائب فاكر أن منظمة رايتس من قبيلة السوالم وإن كلامه هيوصلها وهو قاعد في دوار أبوه.
أنا بصراحة مش عارف أقول إيه تانى غير أن هذه هي نتيجة اختياراتكم لنوابكم.. اشربوا بقى!
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.