الصرف الصحى فين ياشوية نواب تايهين؟!

يعنى ينفع كده؟!.. لو ينفع يبقى أنا أكيد مجنون.. وأنا جمعتكم النهارده يا أهل دايرتى علشان تجاوبونى.. هو من إمتى والشعب هو اللى بيتحمل تكاليف إنشاء شبكات الصرف الصحى؟!
طبعا ماحدش عنده إجابة.. لكن الإجابة هتلاقوها عند نوابكم اللى اخترتوهم على حسابى أنا ابنكم وحامل همومكم..
الإجابة أن الحكومة حبت تتهرب من الصداع بتاع الأهالي في كل الأحياء والقرى والنجوع الخاص بطلبات توصيل الصرف الصحى.. لأن الحكومة مفلسة زى ما حضراتكم عارفين.. بس مكسوفة تقول ماعنديش فلوس للصرف الصحى بتاع اللى جاب أبوكم.. قوم إيه اقترحت أن الأهالي يقوموا بتوصيل شبكات الصرف على نفقاتهم للإسراع من تعميم شبكة الصرف في جميع ربوع مصر قبل انتهاء عام 2018.. أي والله الحكومة قالت كده وقدمت الاقتراح للبرلمان باعتباره ممثل الشعب.. وقوم إيه بعض نواب البرلمان وافقوا على اقتراح الحكومة مثلما يوافقون على كل الاقتراحات.. وقال بعضهم إنهم على استعداد للمساهمة بأموالهم في إنشاء شبكات الصرف في دوائرهم بمشاركة الجمعيات الأهلية.. وراحوا يقنعون باقى النواب بالفكرة الجهنمية..
عارفين ليه؟!.. لأن أول طلب بيطلبه الأهالي من أي نائب هو الحصول على تأشيرة من الحكومة بتوصيل الصرف الصحى لأن تكلفته تصل للملايين.. وطبعا سيادته مش هيقدر.
ههههههههههههه قال إيه النواب هيصرفوا على الصرف بتاع الأهالي.. جديدة دى بصراحة.. وقال إيه الجمعيات الأهلية هي اللى هتشرف على إنشاء الصرف بتاع الأهالي.. برضو جديدة دى.
طب السؤال هنا بقى.. هو الصرف الصحى بتاع السادة النواب فين؟! وللا هما لسه تايهين؟!
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016