«شريف إسماعيل» ل «سطوطة الفنجرى»: إحنا ممكن نخلى الشعب عايش في نعيم.. لكننا بنخاف عليكم

مكانش ممكن تعدى أيام العيد بدون أن أتصل بصديقى الباشمهندس شريف إسماعيل رئيس وزراء مصر.. دى عادة سنوية استمرت لسنوات طويلة.. فشريف إسماعيل صاحب واجب مع أصدقائه.. وعلاقتى به توطدت منذ أن كان وزيرا للبترول، وأجريت معه أول حوار في نفس تلك المساحة.. خمس سنوات وشريف إسماعيل لا يفوت مناسبة إلا ويهنئنى بها خاصة عيدى رمضان والأضحى.. إلا أننى سبقته في هذا العيد واتصلت به لأهنئه لعلمى بمشغولياته الكبيرة في الفترة الأخيرة
استقبل رئيس الحكومة تهنئتى بسعادة غامرة.. وبعد التهانى والذي منه دار بينى وبينه حوارا رأيت أنه يستحق النشر.. وهو ما سأعرضه عليكم في السطور القادمة:
قلت له: هو إحنا كشعب هنفضل مطحونين كده لغاية إمتى ياهندسة؟!
قال: والله الموضوع ده له إجابات كتيرة ياست سطوطة.. لكن أنا هقولك إجابة ماقلتهاش لحد قبل كده.. بس هي دى الحقيقة اللى ماحدش يعرفها!
قلت: قول يانور العين وسرك في بير.
قال: إحنا ممكن نخلى الشعب عايش في نعيم.. لكننا بنخاف عليكم!
قلت: وخايفين علينا من إيه بقى سيادتك؟!
قال: من أنفسكم.. فالنفس أمارة بالسوء.. والمواطن إذا عاش في رفاهية يصاب بالتخمة.. دا كمان ممكن ينتحر لو ملقاش حاجة تعكنن عليه!
قلت: ياسلااااااااااااااااام.. اسمع كلامك أصدقك.. أشوف أمورك أستعجب.. طب تقدر تقولى هتجيب إمكانيات منين علشان الشعب يعيش في نعيم؟!
قال: الخير كتير والحمد لله.. بس دى سياسة دولة ياهانم
قلت: يعنى أنتم منشفينها علشان خايفين علينا؟!
قال: طبعا.. ولسه كمان هنزود الأسعار تانى وتانى.. هو انتى مش بتسمعى عن المواطنين اللى بينتحروا في الدول الغنية علشان مكتئبين من عدم وجود مشكلات؟!
قلت: ياراجل ماتشتغلنيش.. الدنيا أعياد!
قال: طب أنا هحكيلك حكاية وانتى هتفهمى إحنا كحكومة معكننين على الشعب ليه!
قلت: احك ياباشا وأنا سامعاك أهه.
قال: شوفى ياستى ولا سيدك إلا أنا.. في يوم من الأيام سقط برطمان العسل على الأرض.. فجاءت نملة صغيرة فتذوقته وأكلت منه.. النملة بقى حاولت تمشى لكن يبدو أن طعم العسل قد راق لها.. فعادت وأخذت رشفة أخرى ثم أرادت الذهاب لكن يظهر إنها لم تكتف بما أخذته من العسل.. بل إنها لم تعد تكتفى بارتشاف العسل من على حافة البرطمان.. وقررت أن تدخل في العسل لتستمتع به أكثر وأكثر
دخلت النملة في برطمان العسل، وأخذت تستمتع به وترتشف حتى شبعت تماما، وأصيبت بالتخمة فلم تستطع الخروج من بحر العسل الذي أغرقت نفسها به.. حيث كبل أيديها وأرجلها.. والتصقت به ولم تستطع الحركة وظلت على هذا الحال إلى أن ماتت.. وتوتة توتة.. فرغت الحدوتة!
قلت: طب وأنا فهمت إيه بقى من أم النملة الفطيسة دى؟!
قال: برطمان العسل كان سبب هلاكها.. وعدم اقتناعها بما ارتشفته منه كان سببا لنهايتها.. ولو اكتفت بالقليل من العسل لنجت.. والسبب في كل ذلك هو توافر العسل لها بكميات كبيرة علشان كده إحنا ماينفعش نقدم للشعب احتياجاته كلها مرة واحدة فيغرق فيها عن بكرة أبيه ويتوه في الرفاهية التي لم يعتاد عليها!
قلت: والله عداكى العيب ياحكومة.. كل سنة وأنت طيب ياهندسة!