"كلنا خالد سعيد" تحتفل بوصول أعضائها ل 3 ملايين

احتفلت صفحة "كلنا خالد سعيد" بوصول عد أعضائها ل 3 ملايين عضو.
وقالت فى تدوينة على صفحتها بموقع "فيس بوك": الصفحة وصلت ل 3 مليون عضو .. لسه فاكرين تاني بوست على الصفحة: "يا جماعة احنا بقينا 300 شخص في دقيقتين .. عايزين نبقى مائة الف .. لازم نتحد" .. وقتها كان الحلم إننا نبقى 100 ألف مصري مجتمعين! .. ومرت الأيام بحلوها ومرها .. بإنجازاتنا واحباطاتنا لحد يوم 14 يناير .. قبل 11 يوم من الثورة لما انطلقت أول دعوة ليها من الصفحة كنا وقتها 350 ألف مصري .." .
وأضافت "والنهاردة بقينا 3 مليون شخص .. مختلفين عن بعض .. عايشين في أماكن مختلفة .. تعليمنا غير بعض .. أفكارنا وأحلامنا مختلفة .. حتى منظومة أفكارنا وعقائدنا مختلفة .. بس برضه بيجمعنا كلنا صفحة أيا كان سبب الاشتراك فيها .. حتى لو بعض المشتركين ضدها ".
وأشارت الصفحة إلى أن "طريق إصلاح البلد دي لسه طويل جدا .. والثورة كما هي حلم وأمل للمستقبل .. هي معاناة وصراع مع الماضي والحاضر .. كتير أوي من معاركنا اللي بنخوضها بنخسرها وكتير منها بنكسبها .. أهم حاجة كشباب نتعلم من أخطاءنا ولو كانت كبيرة ونفرح ونحتفي بانتصارتنا ولو كانت صغيرة .. ونكون استوعبنا إن الثورات في حياة الشعوب مش بتتقاس بالأيام ولا الشهور بل بالسنين لحد ما بيحصل التغيير الجذري في المجتمع للأفضل " .
مضيفين "لسه الحياة قصادنا طويلة والبلد دي بتتغير وهتتغير واحنا مش هنبطل نحلم ليها بمستقبل أحسن بكتير من اللي احنا فيه .. ومهما كان فيه محبَطِين ومُحبِطين .. هنفضل نشتغل ومش هنتوقف ولا نستسلم .. واحنا اللي هنحبط الاحباط!" .