بختك اليوم "الأربعاء" من هريدى نيوز

يا تكون محظوظ يا تكون منحوس مع بختك فى هريدى نيوز:
-الحمل
تخين ومكعبر وفاكر نفسه كرومبو وهو آخره يشيل الشنطة للست .. اللى زى ده اديله على قفاه.
_الثور
كل الحلوين اتجمعوا عشان "الثور" يكون راضى وانت ترفس النعمة برجلك هتغور من وشك.
_الجوزاء
خلى بالك من اللى يعمل صاحبك وحبيبك وهو زى "التعبان" يقرصك ويعمل نفسه تعبان ومفاجأة حلوة كنت مستنيها.. انت اللى فيهم وبس وكل الباقى خس.
_السرطان
لو فاكر نفسك "سرطان" فيه أخطبوط مستنيك ..خلى بالك من دماغك وودانك وصوابع رجليك.
_الأسد
بعد اللى حصل واللى جرا هات الدفاتر تتقرا وافضح كل اللى يقف فى وشك وقولهم اللى بيته من قزاز ما يحدفش الناس بالطوب "اردح بالبلدى"
_العذراء
مش كل من يتقاله يا عذراء يبقى طيب يبقى من نفس برجك ويرسم عليك.
_الميزان
قطع كابلات النت بفعل فاعل وحريق البيوت بفعل الجن واللى هيحصلك بفعل عفريت حطك فى دماغك ومش هيسيبك ..أشتاتا أشتوت اديله بالشلوت.
_العقرب
اقعد واتمنظر واتجعص واتفشخر حقك وانت عقرب وعلى الأبراج "مسيطر".
_القوس
ما تبقاش زى الكوسة يوم مطبوخة ويوم مهروسة خليك زى الباذنجان يوم مقلى ويوم بابا غنوج.
_الجدى
لو عندك عيال خاف عليهم واربط نفسك فى السرير وانت نايم.. مرض المشى أثناء النوم انتهى من الأربعينات انت قديم أوى.
_الدلو
سلامات سلامات سلامات يا حبيبنا يا بلديات.. مش كل من قالك انه قريبك يبقى عايز مصلحتك ممكن يبقى عايز يمد إيده فى جيبك.
_الحوت
لما تشتغل بذمة وضمير وتعرف الناس كلها إن شغلك أحسن شغل فى الدنيا وتتفاجئ إنك مخصوملك 10 أيام لأنك ما عملتش شغلك يبقى انت أكيد أكيد فى عصر النهضة يا "حوت".