بالفيديو.. غضب وسخرية على مواقع التواصل بسبب برج الأزاريطة.. فارس: المنظر ده مش هتشوفه إلا في مصر.. محمد: ما زال فساد الأحياء مستمرا.. هاني: ده إعجاز علمي

امتزج الغضب مع السخرية إثر ميل عمارة الأزاريطة بالإسكندرية على أخرى، الأمر الذي أثار غضب نشطاء مواقع التواصل الاجتماعي، والذين صبوا جام غضبهم على فساد المحليات، الذي بدا واضحًا في محافظة الإسكندرية.
ومالت عمارة مكونة من 12 طابقا على أخرى بعد سقوط عمارة ثالثة بجوارها، وحاول النشطاء تخفيف أثر الصدمة بالسخرية والضحك، ولسان حالهم يقول إنه "ضحكٌ كالبكاء".
سر قاتل
قال إبراهيم عبد المجيد "ما حدش يقف ويركن بجسمه أو بإيده على أي عمارة جديدة في إسكندرية.. العمارات فيها سر قاتل".
وأضاف رفيق لايون: "عمارة الإسكندرية في شارع عرضه 8 متر يعني مفروض الترخيص يكون 4 أدوار، تم بناؤها 12 دور، منهم 8 أدوار مخالفة، والعمارة خلف مبنى الحي مباشرة".
وعلق صاحب نظرية الخرم: "برج الأزاريطة المائل بعد الانتهاء منه، الموضوع كله ماركتنج للترويج للنسخة المصرية من برج بيزا المائل".
وتابع محمد عبد الغفار: "عمارة أنا سانده عليك في الإسكندرية".
ما لحقناش
وقال تامر مجدي الشامي: "في الإسكندرية ما لحقناش نفرح بكوبري مصطفى كامل الجديد، تقوم عمارة الأزاريطة تميل".
وأضافت فاطمة طارق: "جشع المقاولين وقلة الضمير.. تكون هذه هي النتيجة حسبى الله ونعم الوكيل.. عمارة الأزاريطة بالإسكندرية".
وعلق مهندس فارس:" المنظر ده مش هتشوفه إلا في مصر.. هي العين تفلق الحجر صحيح بس متخليش عمارتين يحضنوا بعض كدة".
ورد أحمد جوجو: "ليه دى عمارة بقالها 14 سنة وأساسا إسكندرية دى محافظة الفساد في المحليات".
وتابعت "أنوو": "عمارة إسكندرية دي لو معمولة كرتون مش هتقف الوقفة دي".
كوارث موقوتة
وقال أحمد محيي: "في 2013 كان معدل العمارات المخالفة هناك في الإسكندرية فقط ما يزيد عن 13500 عمارة مخالفة ياترى عدد الكوارث الموقوتة دي كام دلوقتي".
وأضاف هاني النادي: "صباح الخير يا إسكندرية.. ده في حد ذاته اعجاز علمي وهندسي هنجيب شلل للكوكب كله.. في البدايه انهارت عمارة قديمة جنب البرج 13 دور اللى مال عالعمارة اللى قدامها وكان ده الساعه 11 بالليل بعدها قبل الفجر بشوية وأثناء السحور مال البرج ال 13 دور على العمارة اللى قدامه.. والوضع الآن إخلاء منطقة الانهيار والميل بالكامل من السكان تحسبا لميل أي عمارات أخرى وقطع الغاز والكهرباء عن المنطقة وفى انتظار مهندسين الحي لدراسة الموقف والتصرف مع هذه الكارثة.. والناس في الشارع...".
وعلقت منه محمد: "موضوع عمارة إسكندرية ده مرعب جدا بجد ربنا يكون في عون الناس دي هيعملوا ايه ويروحوا فين واحنا في رمضان".
وردت "أندومي": "مش عارفة بصراحة المشكلة دى هتتحل ازاى دة لا عمارة ولا اتنين ولا منطقة ولا اتنين معظم الإسكندرية كدة طب هيخلو إسكندرية كلها من السكان".
وتابع أحمد درويش: "دي عمارة عايزة تنهار في الازاريطة ومش عارفه... رمت بلاها على اللي نحوها.. إسكندرية".
برج إسكندرية المائل
وقال وليد أسمرا:"لما الدولة تبقى مش عارفة مين المهندس اللى رخص، ومين المقاول اللى بنى يبقى المنظر ده هيتكرر ألف مرة خسارتك يا إسكندرية.. عمارة الأزاريطة".
وأضافت مريم ميستري:"عمارة إيه اللي ميلت بس ده عشان نزود السياحة برج إسكندرية المايل انتو بتقولوا ايه يا جماعة".
وعلق الحلاج: "ومن الحب ما قتل.. عمارة في الأزاريطة إسكندرية مصر تميل على العمارة المقابلة لتحتضنها".
وتابع طارق المهداوي: "عمارة في الأزاريطة بالإسكندرية واخدة عمارة تانية جارتها بالأحضان وماله يا خويا عادي جدًا ما هي عمارات إسكندرية لبعضيها برضو".
وقال محمد سالم: "عمارة الأزاريطة بالاسكندرية ريحت شوية بعد السحور.. الإسكندرية ومازال فساد الاحياء مستمر".
وأضاف محمود ابن سليم:"عمارة الازاريطة هيلا هوب زقة معانا كده يا برنس عشان نعدلوها والله احنا شعب طيب".