طوبة على طوبة.. النائبة بوظت الخطوبة

وقال على رأى المثل "الفاضى يعمل قاضى".. وإحنا عندنا كام نائب كده تحس إنهم فاضيين ومش عارفين يعملوا إيه أو يطالبوا الحكومة بإيه أو شغلانتهم في البرلمان إيه.. وخاصة نواب دايرتنا..
وأنا بقى جمعتكم النهار ده يا أهل دايرتنا الكرام علشان أوريكم نواب الدايرة بيعملوا إيه في البرلمان.. طبعا ماتتعشموش إنى أقولكم إنهم بيقدموا طلبات إحاطة لحل مشكلاتكم.. لأن هذا هو آخر ما يعنيهم.. أو علشان نبقى منصفين ولا نظلمهم.. مافيش حد فاضى يسمع منهم مشكلاتكم.. نوابنا اللى انتخبناهم بقت مهمتهم الحصول على أفكار تصنع جدلا في المجتمع لا أكثر ولا أقل.. والدليل على كلامى هو مشروع القانون اللى الست النائبة بتاعتنا تقدمت به للجنة التشريعية بالبرلمان.. أو علشان نكون منصفين.. هي تقدمت به للفضائيات علشان تبقى ضيفة على القنوات كام يوم كده وتعرفنا إنها موجودة أهه.
النائبة بتاعتنا بقى اكتشفت فجأة إن الشباب المخطوبين مالهمش قوانين تحكمهم، وتعكنن على أم اللى جاب أبوهم.. فقوم إيه بقى قدمت مشروع لقانون يقضى بالسجن للشاب اللى يخطب بنت أكتر من سنة.
وكمان لازم الشاب ده يحدد هو هيعمل إيه خلال السنة.. هيزور العروسة كام مرة.. وكام مرة هيخرج معاها.. وإيه نوعية الزيارات والهدايا اللى ناوى يجيبها خلال أم السنة المنكوبة
وقوم إيه بقى علشان ماحدش يتهمها بأنها ضد الشباب الذكور.. راحت تطالب بمعاقبة العروسة بالحبس برضو في حال فسخت الخطوبة بدون سبب مقنع.. أو عدم رد الهدايا اللى جابها الخطيب.. وطبعا كل هذا سيكون مكتوبا في عقد يوثق في الشهر العقارى.. وطوووووووبة على طوووووووبة.. النائبة بوظت الخطوبة!
طب بالله عليكم يارجالة: مين بقى الشاب المجنون ابن المجنونة اللى هيروح يخطب ويكتب على نفسه كل الشروط بتاعة نائبتنا المبجلة؟!
طب الحكومة هتجيب منين محاكم للخطوبة ومشكلاتها.. مش كفاية محاكم الأسرة ياجدعان؟!
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016