المترو بجنيه تانى !!

هانى الملواني، مدير كبير في وزارة النقل: المترو لازم يغلا.. يعنى لازم يغلا.. يا أفندم؛ ده مطلب شعبى بل جماهيرى معاليك...
المسئول المهم جدًا باستغراب شديد: يا سلام... أنا أفهم أنك تقول لى إن المترو بيخسر كتير عشان كده تذكرته لازم نزودها حبتين؛ ماشي.. ده كلام معقول، بس إيه حكاية إن الموضوع ده مطلب شعبى بل جماهيري... أنت بتتمسخر بى يا ملوانى أفندى ؟!!
الملوانى برعب شديد: معاذ الله يا معالى الباشا أن أكون من الساخرين، إنما الموضوع عايز شوية شرح... أنا أفهم معاليك، بقى المترو من زمان وهو مرفق في غاية الأهمية للشعب المصري؛ لأن عموم الناس بتركبه اللى بيروح بيه أشغاله بيروح، واللى بقضى بيه مصلحة بعمل كده، ده وصل الأمر ببعض الركاب إلى أنهم يفضلوا مستقلين المترو رايحين جايين دون أي هدف من المرج لحلوان ومن شبرا الخيمة للمنيب عشان يتفسحوا، وهذا يمثل ضغطا رهيبا على هذا المرفق الحيوي؛ لذا.. فلابد إننا نحجم موضوع الركوب ده بزيادة ثمن التذكرة عشان الفئات غير المسئولة اللى بتستخدم المترو بدون لزوم تخف شوية، واللى ما عندوش مصلحة مهمة يتلم ويرْكزْ في بيتهم شوية يتفرج على التليفزيون ولا ينام ويتخمد يريح نفسه ويرحينا معاه، كما إن جنيه واحد زيادة في ثمن التذكرة مش هايفرق مع المواطن المصرى اللى بيركب ميكروباصات وأتوبيسات وحتى تكاتك أغلى من كده بكتير، وحياتك يا معالى الباشا الكبير.. أنا كل ما أعمل جولات ميدانية أنا ولا حد من المسئولين بنقابل الناس في الشارع ونحتك بيهم عشان نعرف مشكلاتهم وطلباتهم، وكلنا بلا استثناء أول ما حد من المواطنين يشوفنا يا أفندم يبقى مبسوط جدا وياخدنا بالأحضان ويبقى هايوطى على إيدنا يبوسها وهو بيقول: زودوا المترو.. زودوا المترو.. علشان كده كلنا شايفين إن معاليك تتخذ هذا القرار الهام دون أي تأخير أو تأجيل.
المسئول المهم بابتسامة كبيرة: الله على ده شعب وحكمته، من بدرى عارف طريقه وسكته، أومال إحنا من أعظم شعوب العالم ليه من بكره تزودوا عليهم المترو جنيه كمان، بس عايزك في الفترة الجاية؛ تكتر إنت ومعظم المسئولين من زياراتكم الميدانية المثمرة دى يمكن الشعب يبوس أيديكم تزودوه كمان خمسة أو عشرة جنيهات بعد ما يزيد وعيهم أكتر وأكتر مع هذه الإنجازات العظيمة.
يتقبل الشعب الزيادة في المترو على مضض ولكنها تتسبب في كوارث عدة عبر عنها الشعب بربابته على طريقة مدحت صالح قائلا:
رافضك يا ملواني.. يا مغلواني.. يا مورستاني
أنا عايز المترو يرجع بجنيه تاني
عشان طنط أماني.. وعبده الفكهاني
وخالتى أم إيهاب.. وبنات وشباب
بيقول آه يانى ؟!!
كفاى استعباط قوانينكوا غبية
مش راحمين راجل ولا حتى ولية
واخدين يا فريد
على مد الإيد
وكرهت حياتي
وطلقت مراتي
وطوّلت إديا
وطوّلت إديا
فيه شخص فظيع
واخد بلابيع.. واخد بلابيع
حالف ليجيب لى الكافية
ونيته أبدا مش صافية
رجليّ بقت حافية
واللى أنا ربيته وداديته
م الغلا بيضيع
وطوّلت إديا
وطوّلت إديا
متسابة في حلوان أحلام مجبورة
وجوزها كريم مستنيها في طرة
وما فيش نقدية
للتذكرة ديه
أصل جنيه تانى دى زيادة قوية
رافضك يا ملواني.. يا مغلواني.. يا مورستاني
أنا عايز المترو يرجع بجنيه تاني
عشان طنط أماني.. وعبده الفكهاني
وخالتى أم إيهاب.. وبنات وشباب
بيقول آه يانى ؟!!