بالفيديو.. سعد الصغير: هددت زميلي ب «كطر» علشان يكتبلي في الامتحان

قال المطرب الشعبى سعد الصغير، «أنا كنت حد فاشل في دراسته، والبنت اللى كانت تجيب شندوتشات جبنة رومى أو بيض بالبسطرمة أو موز معها المدرسة كنت أعلقها وأقولها بحبك واقعد اكل معها وبعدين أمشى وكل يوم على كده».
وأضاف خلال لقائه ببرنامج «دة كلام» تقديم الإعلامية سالى شاهين المذاع على فضائية «dmc»، «رسبت في الصف السادس الابتدائي 3 مرات، وأنا أصلا ضعيف في الإملاء، وحتى الآن».
وتابع: «أبويا قالي عليا الطلاق تكون أمك طلاق بالتلاتة لو منجحتش السنة دى، وهاطردك من البيت، روحت على فراش المدرسة وأخدت منه رقم جلوس الواد اللى هيعقد جنبى وقولت له عايز عنوان الواد ده، وروحت للواد البيت وقولتله يا أبو الكباتن أمى هتطلق وعايزك تغششني فقالى من غشنا فليس منا».
وأوضح: «طلعت كطر من جيبى وهددته، وروحت تانى يوم جالى المدرسة وقاللى خلاص يا أبو الكباتن هغششك، وأديته ورقة الإجابة وحللى الامتحان وربنا كرمنى ونجحت».