هناء نوار تكتب: ماليش غيرك

أنا مخاصماني من صغري
و نِفسي أرجعلي من تاني
باحنّ لروحي من بدري
و باكرهها وعاشقاني
أنا مش عارفة ليا طريق
ومش لاقيالي مَرسَى وبَر
وعمري ف يوم ما كان لي صديق
ولا اتمنيت لغيري الشر
لكن بالقاني رغم الضيق
بادوّر ع اللي يفهمني
والاقي الكون دا كله خنيق
بكل براحُه ما يساعني
وأبص لحالي وابكي عليه
وأحاول الاقي حل بديل
وشبح الغربة إبن الإيه
يتوّه منّي أي دليل
واصبَّر نفسي بدموعي
واسافر جوة حلم بعيد
ألاقي الحزن فِ ضلوعي
بيكسر نبرة التنهيد
وكل ما اقول خلاص حافرح
الاقي الفرح يعاندني
ومهما بالخيال باسرح
شيطان الوحدة يطاردني
يشاور من بعيد بإديه
و عينُه يطّق منها شرار
يقولّي تعالي ياسمِك إيه
راح احكيلِك كتير أسرار
وباصرخ صرخة مكتومة
وباسمعها لكن صدى صوت
وأقول دى نهايتي محتومة
وأنا بقرّب خلاص للموت
لكن فجأة باشوف النور
و باسمع صوت ادان الفجر
أحس الكون كما البنور
وعتمة ليلي زارها البدر
أروح اتوضّى واستغفر
واصلي السنة قبل الفرض
وبادعي لربنا يغفر
ذنوبي المالية كل الأرض
واحس براحة جوة القلب
وباتصالح على نفسي
وبارفع أيدي أقول ياااارب
ماليش غيرك طبيب نفسي !!