«رئيس الوزراء» ل«سطوطة الفنجري»: قولوا للشعب يحمد ربنا على النعمة اللي هو فيها

شوية أخبار مجهولة المصدر على شوية شائعات عرفت منها أن الحكومة هتتغير.. دا بالإضافة إلى شوية تصريحات لكام نائب كدا برغبتهم في سحب الثقة من الحكومة.. حبيت أطمن على مستقبل صديقى الجميل وحبيب قلبى «الباشمهندس شريف إسماعيل» رئيس مجلس الوزراء.. فقررت أن أتصل به وأحدد معه موعدا للقاء.. ومع فنجان القهوة دار بيننا هذا الحوار:
قلت: هو إيه حكاية سحب الثقة من الحكومة اللى بنسمعها اليومين دول ياهندسة؟!
قال: ومين دا اللى ممكن يسحب الثقة مننا ياسطوطة هانم!
قلت: البرلمان يامان
قال: طب هو إحنا كنا أخدناها منه علشان يسحبها مننا؟!
قلت: ماهى الحكومة ماينفعش تاخد قرار إلا بموافقة البرلمان يامان!
قال: والله انتى طيبة خالص يا سطوطة.. البرلمان بيوافق على اللى إحنا عايزينه يوافق عليه وبيرفض اللى إحنا عايزينه يرفضه.
قلت: بس موضوع أن البرلمان هيسحب الثقة من الحكومة دا منتشر جدا اليومين دول لدرجة أننى قلقت على معاليك.
قال: ماتقلقيش خالص.. إحنا عارفين مين اللى بيطالب وعارفين إمتى هيسكت.. كله تحت السيطرة ياصديقتى.
قلت: طب ربنا يطمنك ياسيدى.. بس إيه حكاية إن الحكومة عايزه تلغى وزارة البيئة؟!
قال: مالهاش أي ستين لأزمة.. بينى وبينك إحنا ناويين نضم كام وزارة كدا في بعضهم علشان نخفض عدد الوزراء.
قلت: وياريت كمان تضموا المحافظات في بعضها ونوفر عدد المحافظين!
قال: والله فكرة حلوة هي الناس كدا كدا لا تعرف وزراء ولا محافظين.. مايعرفوش غيرى أنا.
قلت: دا حقيقى.. بس الشعب اللى مايعرفش غيرك زعلان منك خالص بسبب زيادة الأسعار وعدم زيادة المرتبات وتعويم الجنيه وحاجات تانى بالهبل.
قال: أهو اللى انتى بتقوليه دا هو الهبل.. الشعب أصلا مابيعجبوش العجب ولا الصيام في رجب.. قولى للشعب يخليها على الله ومايلتفتش للحاجات الصغيرة دى.
قلت: الناس تعبانة يامعالى دولة الوزير.
قال: طب أنا هحكيلك حكاية حصلت في الهند وافهميها انتى براحتك بقى
قلت: احكى ياشهريار
قال: كان فيه ملك بيحكم الهند.. طلب من وزرائه أن يجدوا له حلا في مشكلة الفئران اللى بهدلت القصر.. فاقترح الوزراء أن يأتوا بالقطط لتطرد الفئران.. فوافق الملك وجاءت القطط وبالفعل هربت الفئران.. لكن كانت القطط بتقعد على السجاجيد وتمزقها بمخالبها.. فطلب الملك حل المشكلة كى لا تخرب القطط الأثاث.. فجاء الوزراء بالكلاب وهربت القطط.. إلا أن الملك كان مش عارف ينام من كثرة نباح الكلاب.. فجاء الوزراء بالأسود فهربت الكلاب.. فخاف الخدم من الأسود ولم يجد الملك من يخدمه في القصر.. فجاء الوزراء بالأفيال.. فصرخ الملك غضبا.. فأتى الوزراء بالفئران من جديد وهربت الأفيال.. وهنا قال الملك الحمدلله على هذا.
قلت: لا ياراجل.. ودا معناه إيه بقى؟!
قال: معناه إنكم تقولوا للشعب يحمد ربنا على النعمة اللى هو فيها