الأخ الصغير "آخر العنقود" هو من يحوز دائما على اهتمام العائلة ولا يستطيع أن يرفض له أي من أفرادها طلبا حتى وإن كان ثمن "المشاوير" التي يؤديها نيابة عن أشقائه أو والدته، وهو ما جعل رواد موقع التواصل الاجتماعي "فيس بوك" يستعرضون تسعيرة الأخ الصغير لتلك المشاوير من خلال صفحة تدعى "الكومنت الفصيل". حسب المسافة وحجم الحاجة قال محمد: "على حسب المسافة وحجم الحاجة يعني مثلا من قدام البيت كيس شيبسي بجنيه بياخد نص (جنيه) من الشارع اللى جنبنا بياخد جنيه أبعد من كدا 2 جنيه.. ولو بيجيب شيبسي عائلي يبقي بياخد نص جنيه وشوية شيبسي ولو مكان بعيد 2 جنيه وشوية شيبسي اكتر دي حسبة معقدة تختلف موازينها الدراسية من شخص لآخر". بياخد تمن الحاجة ومبيجبهاش وأضاف إسلام: "لا أنا بقى أخويا يختلف عن الآخرين لو بعته يجيب كيس شيبسي لازم يجيب لنفسه واحد زيه والله عادي مش مشكلة عندي، المشكلة أن روحي بتطلع وساعات توصل إني أبوس إيده كمان آه والله زي ما بقول ليكوا كده". وقالت أميرة: "ابن أخويا مابيخدش حاجة زيادة عن الحاجة اللي عاوزنها، بس بياخد الفلوس ومابيجيش تاني بيجيب بيها حاجة لنفسه بعد ساعة مثلا، ييجي نقوله فين الحاجة يقول جيبت شيبسي وكلته". أقل مشوار 5 جنيه أصل الدولار غلي وأضاف أحمد: "ده أقل مشوار بياخد فيه 5 جنيه وبيقولك يا خالو أو يا بابا أصل الدولار غلي وبقى ب 19.53 النهاردة ". وقال محمد: "لا طبعا الأسعار غليت كتير، ده أنا أخويا النهارده عشان بقوله روح هات كيس شيبسي لاقيته بيقولي تفكير 1 جنيه، مشوار 2 جنيه، تسليم الشيبسي 3 جنيه، بقوله طيب والتسليم ده كمان هتتعب فيه بيقولي آه مش ممكن أسرقه وأكله، أنا قلت له بس الأسعار دي غالية أوي قال لي ما هو البنزين والكهرباء غليت، ولا أنت جاي على أخوك الغلبان يا مفتريين يا ظلمة". كيس شيبسي بباقي العشرة جنيه وأضافت أمينة: "أخويا لو راح يجبلي حاجة بتحايل عليه الأول فوق النص ساعة، فمثلا لو أخيرا وافق وهينزل يجبلي كيس شيبسي كبير ومعاه 10 جنيه هياخد الباقي وش أيوه بلطجة". وقالت هبة: "أخويا كان بياخد من 2 ل 5 جنيه ف المشوار دلوقتى حوش ومعاه 1500 وكل ما أقوله هديك خمسة جنيه يقولى بكل سخرية هاها خمسه جنيه إيه اديكى أنا خمسة جنيه وتفكك منى". بيجبلى سكينة من المطبخ ب 10 جنيه وأضافت ميرو: "حضرتك أخويا الصغير عشان يجيبلى سكينة من المطبخ أخد 10 جنيه إنتى في نعمة يا ماما الأسعار ولعت". كل مشوار وليه سعر وقالت أحلام: "على حسب المشوار والحاجة اللى هيشتريها كل مشوار وله سعر بس أقل حاجة 2 جنيه". وأضاف مصطفى: بعته مرة قالى حاخد 5 جنيه قولتله ماشى، وبعد ماجه بحسب الباقى لقيته ناقص تانى 4 جنيه، بسأله قالى أنا أصل جبتلى علبة كانز وأنا جاى".
