أحلام مواطن في الميكروباص

= هو ايه اللي معاك ده ؟! هو ده السا مسووووووووووونك اللي بيقولوا عليه ؟!
- لا ياحاج ده مش سامسونج بس حاجه زيه كده
= تليفون ولا ايه ده طيب ؟!
- ده تابلت وتليفون مع بعض..
= يعني ايه تليفون و"دبلت "مع بعض ؟
- "دبلت "ايه يا حاج.. اسمه تابلت...ده حاجه كده بتتكلم فيها وتدخل على النت وتبعت رسائل نصيه اس ام اس... وبيجيب كل حاجه نفسك فيها...ده ناقص كمان لو عاوز شاي يجبلك
= بجد !!! ممكن يجبلي شاي "" وبيتكلم بجد ومصدق ""
- لا يا حاج طبعا بهزر معاك...بس ممكن تحط عليه كوبايه شاي يعني هاها ها ها
= اه قصدك استخدمه زي الصينيه كده
-بالظبط يا حاج
=طب مدام بيجيب كل حاجه... ممكن تسألهوليه على خاجه كده معلش
-اتفضل يا حاج انا وال دبلت تحت امرك
=اسألهولي..القماش القطن بتاع الفنايل - قصده فانلات - بيتباع فين !!
- نعم !!! ممكن تسأل في الأزهر يا حاج..اكيد مش هعمل سيرش في جوجل على فنايل !! ده ممكن يقفلولي ال G mail فيها دي
= لا منا سألت وملقتش...بالله عليك شوف عشان عاوز اشتري..
- ياحاج انت بتتكلم بجد ولا بتسف عليا...انا عارف قلش الناس الكبيره ده..انت راجل كبير ومش عاوز أأذيك
= لا شوف بجد... ربنا يكرمك...ويسترك ومايعرليك جتة ابدا
- حاضر يا حاج... **بفتح جوجل بعمل سيرش...مبلاقيش حاجه عن الموضوع ده...بيطلعلي صوره فانله داخليه بيضه
= الحاج بلهفه...ايوه الفانله اللي زي دي..فين بقي مكان بيع القماش بتاعها ؟
- والله يا حاج مش كاتبين...للأسف معرفش يطلع المكان...طلع مابيجبش كل حاجه
= طب اكتب بدل فانلات...!
- مش بقولك انت بتسف عليا ؟! احترم سنك يا حاج !!
= والله بجد يابني... اصل انا بفكر افصل الحاجات دي بدل ماشتريها
- ** باخده على قد عقله...وبقوله حاضر...بعمل نفسي بدور....وبقوله **
لا ياحاج برضه معرفش للأسف...
= وبتقولي بيجيب كل حاجه..عارف لو كان سام سوووووونج -بمد الواو - كان عرف هي فين...بس ده شكله صيني
- اه صيني يا حاج...فكك مني بقي
= انت نازل فين قربت ولا لسه !!
- لا لسه قدامي شويه... اسكت بقي عشان انام حبه
= طب بص كنت عاوزك تدورلي على......
- استني استني انا هنزل اهو.....على جنب يا سطي ونبي... انا هكمل الباقي مشي