صحيح المثل بيقول الجيران لبعضيها بس مش للدرجة دى يعنى ما هو برضو المثل بيقول السلف تلف والرد خسارة وده اللى بتعمله معانا أم حسام جارتنا إللى مش مخليه حاجة عندى فى الشقة إلا ما أخدتها السيشوار إللى جابه لى توتى فى عيد جوازنا إللى فات قال لى يمكن يرجعك زى زمان والشوايه علشان أبطل أحرق الفراخ على النار ويا ريتها نفعت وحتى ترابيزة السفرة ماسابتهاش فى الأول قالت لى علشان أعمل عيد ميلاد إبنى وعاوزاهاعلشان أحط عليها التورته والحاجة وطمعت فيها قال إيه العيال بياخدوا عليها دروس وإدينى مستنية الدراسة تخلص علشان أخدها كل ده كوم وإللى جاى كوم تانى كله يهون لكن توصل لحد الطماطم لااااا وألف لااااا عض قلبى ولا تعض طماطمتى ده الكيلو بقى بعشرة جنيه ودى كل شويه تبعت إبنها ياخد طماطمايه بس بصراحة أم كريم الله يبارك لها شافتها فى الخباثة وهى مطلعة قفص طماطم ومغطياه ولولا إنه وقع منه واحدة ماكناش عرفنا طبعا ماهو مافيش جريمة مكتملة والجريمة لا تفيد وساعتها إتفقنا كلنا إننا لازم ناخد حقنا من الست دى وفكرنا فى حيلة واقنعناها بها كمان. إزيك يا أم حسام.. أهلا أهلا إزيكم إتفضلو .. لا شكرا بس كنا عاوزينك فى حاجة .. معلش يا كوكى الواد بس يخلص إمتحانات وهطلع لك السفرة لحد عندك وهصلحها لك كمان .. ليه هى جرى لها إيه .. ولا حاجة البنورة بتاعتها إتكسرت وفرش الكراسى طلع بره و..... .. خلاص خلاص دى مابقتش ترابيزة خليها لك يا حبيبتى إياكش تولع .. هه بتقولى إيه .. بقول يارب تنفع .. وانت يا أم كريم لما أدبح خروف العيد هابقى أجيب لك كيس لحمة .. تشكرى .. وانت يااااا .. خلاص يا أم حسام إحنا بس عاوزين نقولك لو تحبى تشاركى معانا فى أكلة العمارة .. لا لا أكلة إيه أنا مش فاضية .. كوكى : إحنا إتفقنا كل يوم واحدة فينا تطبخ لنا كلنا وبكده نقلل المصاريف ونواجه الأسعار الغالية دى.. والله فكرة حلوة .. أم كريم : لاوكمان فى مفاجأة .. خير .. كوكى هتطبخ لنا طاجن بامية باللحمة الضانى وانتى عارفة بقى الأسعار دى البامية بقت ب 27 جنيه وكيلو اللحمة ب90 جنيه .. يا سلااااام طب والله فكرة انا مشتركة معاكم وأنا إللى هاعمل أول أكلة مكرونة وبطاطس محمرة .. ولية جلدة. وفعلا تانى يوم بعتت أم حسام للعمارة كلها طبق مكرونة وطبق بطاطس وجاء الدور على وخليت إبنى ينزل يستلف منها2 كيلو طماطم علشان أعمل البامية لحد ما أشترى بدالها .. والست ماكدبتش خبر وعدى وقت الغدا واكلت أنا وتوتى والعيال الحمد لله وشويه ولاقتها بتخبط .. فين يا كوكى طاجن البامية .. يوووووه هو أنا مش قلت لك .. لا. مش إتحرق منى بس معلش يتعوض إن شاء الله هاعملكم كوسة زى ما قال وزير التموين بس إبعتى لى 2 كيلو طماطم تانيين .. لااااااا أنا مش عاوزة حاجة خالص متشكرة .. طب وحياتك ماتنسيش تصلحى السفرة وتطلعيها بكرة وتجيبى لها بنورة وفرش جديد مكان إللى اتقطع .. هههه ده أنا كوكى والأجر على الله.