وكان منايا.. ينهار كفاية.. ما انهارشى ليه ؟!!

عبادة المرقوشى وقد وضع رجلا على أخرى وراح يصغى بكل جوارحه لشحاتة على الله الذي كان يقرأ له آخر الأخبار متسائلا: ها... وبيقولوا إيه تانى يا واد يا شحاتة ؟!!
شحاتة على الله ضاحكًا بملء فيه: بيقولوا حاجة تضحك قوى يا عم عبادة اسمع يا سيدى «مفاجأة سارة لجميع المصريين؛ فقد انهار سعر الدولار الأمريكى اليوم أمام الجنيه المصري، حيث هبط الدولار بقيمة عالية مرة واحدة ليخبرنا أن سعره الأيام القليلة الماضية لم يكن منطقيًا، وللحفاظ على انخفاض سعر العملة الورقية الخضراء تطالب الغرف التجارية المستوردين بوقف التعامل بالدولار الأمريكى لمدة تستمر أسبوعين.
وانهيار الدولار الأمريكى اليوم الذي جاء بقيمة 5 جنيهات دفعة واحدة ؛ حدث نتيجة للقرارات العظيمة التي اتخذتها حكومة رئيس الوزراء شريف إسماعيل، كما صرح المتعاملون والتجار في الأسواق السوداء أن السوق في حالة من الهلع والترقب، كما يتوقع أيضًا المحللون الاقتصاديون التراجع بشكل أكبر في أسعار العملات الأجنبية الأسابيع المُقبلة، كما يترقبون ضربة قاصمة من البنك المركزى المصرى الأيام القادمة بعد تحريره لسعر الصرف.
سعر الدولار في البنوك المصرية يستقر كما هو طبقًا لآخر قرار صادر عن البنك المركزى المصري، حيث يسجل 14.00 جنيها مصريا في حالة الشراء، كما يسجل 14.13 جنيها في حالة البيع، وفى السوق السوداء انهار الدولار بشكل لا يصدقه أحد حيث بلغ اليوم 12.90 جنيها مصريا في حالة الشراء، كما يسجل 13 جنيها مصريا في حالة البيع.
عبادة المرقوشى متعجبا بشدة: يا نور النبي... بقى الدولار في البنك ب 14 جنيها وفى السوق السوداء ب 12 و13 ودول شغالين، ودول شغالين... حكمتك يارب ؟!!
شحاتة على الله مؤيدًا لرأيه: أما الاقتصاد ده بحوره غميقة قوى يا عم عبادة.. والواحد الغلبان اللى زى حالاتى يغرق في قلبيها في شبر ميه...، يعنى العقل بيقول إنه لما الدولار يكون رخيصًا عند البنك... قوم السوق السودا دى ما يبقالهاش لزوم وتجيب ضرفها، لكن سبحان الله اللى ربك كاتب له رزق؛ ما يمنعوش مخلوق أبدا... ولاّ يمكن العالم اللى بتغير في السودة دى بيغيروه عند قرايبهم وما يهونش عليهم يقطعوا عيشهم ويسودوها عليهم أكتر ما هي سودا ومهببة، أو يكونش الجماعة دول مساطيل وشاربين القرش كله.. ودماغهم مونونة ومزاجهم عالى وما تهمهومش الفلوس، وبعدين النيلة الدولار ده.. يبقى انهار إزاى ؟ وهو نط بقدرة قادر من 8.88 ل 14 جنيها مرة واحدة ؟!!، هو يعنى يبقى الناس اللى بيغيروا الدولار مساطيل، والعالم اللى كاتبين الكلام ده كمان مجانين ؟ ولا إحنا اللى بهايم ؟ ولا إيه الموضوع يا عم عباده ؟ أنا البرج اللى فاضل في نافوخى هايطير خلاص ؟!!
عباده المرقوشى وقد استلقى على قفاه من شدة الضحك: ما تآخذنيش يا واد يا شحاتة أصلك مش لوحدك اللى قربت يجيلك لطف يا وله، إمبارح الواد عوضين كلاف البهايم بعد ما حفى عشان يلاقى واحدة ترضى تتجوزه ورجليه ورمت من كتر اللف؛ قالك يعنى هي لا هتبقى دنيا ولا آخرة، راح بايع الجاموسة اللى حيلته وقرر يطلع يعمل عمرة؛ وراح عشان يغير الفلوس المصرى اللى معاه بدولار أمريكانى أو ريال سعودى بعد ما سمع عن موضوع الانهيار ده؛ قام لقي لك السوق السودا مولعة ب17 والبنك رفع ل 14؛ وعنها وقابلتهولك وأنا راجع من صلاة العصر ماشى بيكلم نفسه يا عيني، وعمال يغنى أغنية الست أم كلثوم بس على طريقته الخاصة وهو بيدندن من غلبه ويقول «وكان منايا.. ينهار كفاية.. ما انهارشى ليه».. ومن ساعتها والمسكين جاتله غيبوبة سكر وراقد في المشتشفى الميرى وأهله بيصرفوا على علاجه من فلوس بيع الجاموسة !!!