إديني الشقة بسرعة.. أرجوك محتاج القرعة!!

شحاتة على الله ممسكا بالجريدة اليومية وقد كاد يطير من فرط السعادة موجها كلامه لعبادة المرقوشي: خلاص فرجت يا عم عبادة وحلاوة ابنك اللى شغال في مصر بقاله عشر سنين وساكن بالإيجار وطلعانة عينه هيلاقي له شقة تمليك يا عم.. وقاشيته هتبقى معدن.. مش سبق وقلت لك إحنا في عصر جديد وأيام عز وهنا.
عبادة المرقوشى متهللا: بجد والنبى يا واد يا شحاتة ربنا هايفرجها ع الواد حلاوة الغلبان ؟!! حقة دا كان تبقى لك الحلاوة الكبيرة يا وله...
شحاتة مكملا حديثه: اسمع يا سيدى بقى شروط التقدم لحجز 30 ألف وحدة سكنية لمتوسطى الدخل بمساحات تتراوح ما بين 100 متر وحتى 135 مترا مربعا، وذلك في 8 مدن جديدة وهى "القاهرة الجديدة و6 أكتوبر والشروق والعبور والعاشر من رمضان ومدينة بدر ودمياط الجديدة"، ويأتى في مقدمة هذه الشروط ألا يقل الدخل الشهرى للمتقدم عن 5 آلاف جنيه، ومقدم الحجز يصل ل20% من قيمة الوحدة.
وتتضمن الشروط أيضا أن نظام الحجز سيكون بنظام أسبقية الحجز وليس القرعة، وسيتم تقسيط الوحدة على 15 عاما بنظام التمويل العقارى بفائدة 8% فقط وذلك لأن المشروع سيتم طرحه ضمن مبادرة البنك المركزى. وقال الدكتور مصطفى مدبولى وزير الإسكان: إن سعر الوحدة يتراوح بين 200 ألف جنيه و400 ألف جنيه حسب أسعار كل مدينة على حدة، لافتًا إلى أن الوزارة حريصة على ألا تزيد على 450 ألف جنيه.
وأوضح أن نظام حجز هذه الوحدات سيكون بنظام أسبقية الحجز وليس القرعة، وأن مقدم هذه الوحدات سيتراوح ما بين 40 ألف جنيه و80 ألف جنيه ويسدد باقى الباقى على 15 سنة وذلك من خلال مبادرة البنك المركزى للتمويل العقارى بفائدة 8% وذلك ببنوك (التعمير والإسكان والأهلي ومصر والقاهرة). وأشار إلى أن أسعار وحدات الوزارة تقل عن أسعار السوق بنسبة 25%، بالإضافة إلى تشطيب الوحدات كاملًا، على أن تكون الوحدات داخل كومباوند سكنى متكامل الخدمات.
ابن أبو سويلم أبو لسان زالف بعد أن أطلق ضحكة رفيعة رقيعة: جات الحزينة تفرح ما لقيتلهاش مطرح !! يا عينى ع الغلبان يا ولداه...
سلماوى المدندش مفتش العلوم بالجيزة التعليمية والذي كان متواجدا في الكفر لظروف خاصة متعجبا: السيد الوزير بيقول "شروط التقدم لحجز 30 ألف وحدة سكنية لمتوسطى الدخل منها في المقدمة ألا يقل الدخل الشهرى للمتقدم عن 5 آلاف جنيه، يا ترى مين من أغلبية الموظفين في الحكومة دخله كدا يا إخوانا ؟!!... أنا على سبيل المثال عينت عام 1978 وصرفت مرتبى هذا الشهر بعد البدلات 2875.5 جنيه وأساسى المرتب 980 جنيها أي بعد نحو 36 سنة خدمة في الحكومة وهذا مرتبي.. ومع ارتفاع الأسعار الرسمية للكهرباء والبنزين والغاز والمياه والمواصلات و... و.. وارتفاع الأسعار غير الرسمية في كل المجالات ما بقاش ليهم لأزمة.. كيف نحل هذه المعادلة والتي يعجز عنها أينشتين نفسه ؟!! ومعالى وزير الإسكان اسم الله على مقامه راح حللها لنا كده بجرة قلم ولاطع المبلغ الكريم.. حلول عاملة زى ما تكون زلطة حدفك بيها غشيم بتيجى في النافوخ علطول تخليك ما تحوطتش منطق !.. مش بقولكم.. تيجيبها كده.. تجيبها كده..هي كده... للأسف ما فيش فايدة..
على السنجرى المعيد بكلية الاداب جامعة القاهرة مؤيدا:على كده بقى ومصداقا لكلامك يا أستاذ سلماوى اللى دخله من 3000 إلى 4000 لا يتقدم للحجز في محدودى الدخل ولا في متوسطى الدخل حتى لو كان مدرس بالجامعة !! يعنى الشريف يعمل ايه وهو مش عارف يتقدم لحجز شقه في بلده يا ناس ؟!!، أكيد الوزير ده بيتكلم عن متوسطى الدخل بتوع سويسرا أو بلجيكا !! دا كمان بيقولوا أن الوحدة من 200 ألف 400 ألف جنيه !!!.. يا سلام لو كان الجدع اللى حاطط الشروط دى أبدع شوية وخلاها بالدولار أو باليورو مش كان يبقى أنسب برضه !!
ابن أبو سويلم مستغلا كلام على السنجري: الحكومة أيها القوم الناقمون عليها بتوفر مساكن للى بالى بالك.. انتو مش معمول حسابكم في المشاريع دى خالص.. عشان أنتم ما بتعرفوش تتعاملوا.. ودى مش مشكلة الحكومة انت مش عارف تبقى حرامى الحكومة ذنبها ايه ؟ !! افهموها بقى أيها القوم الشرفاء – ثم بسخرية فجة - عموما أنا كان نفسى آخد شقة في المشروع ده.. لكن ال 5 آلاف جنيه مرتب هتخلى الفقراء والعالم الزبالة يسكنوا الشقق دى وهتبقى بيئة ع الآخر..لذلك أنا هاستنى حاجة أغلى شوية تليق بمعدومى الدخل الأرستقراطيين أمثالي..
وبينما هم كذلك إذ دخل عليهم شيخ البلد لاطما على صداغه وهو يقول: غيتيونى يا خلق هوووه... الواد مصطفى ابنى اتجنن يا خوانا وحاشوه في السرايا الصفرا، الواد بعد ما سمع بموضوع الشقق واتأكد إن كل الشروط منطبقة عليه طلع جرى ع الوزارة يحجز وفلوسه معاه قالوا له كل الشقق اتحجزت بعد نص ساعة بس من فتح الباب، وذلك لأن اللى معاه فلوس شال يا معلم.. ولو لسه عايز شقة في المشروع تقدر تشتريها من اللى حجزوا في المشروع فعلا.. واللى اتضح بعد كده أن كلهم شغاليين تبع حوت كبير لم الشقق وبيتاجر فيها دلوقت براحته مستغلا موضوع أسبقية الحجز وإلغاء القرعة وبيقول لك الشقة دلوقت وصل سعرها مليون جنيه وهى لسه ع الورق يا إخوانا، والواد يا عين أمه من ساعة ما سمع كده وعقله شت وسايبه في المستشفى بيدو له جلسات كهرباء كل نص ساعة وهو لا على حامى ولا بارد وعمال ينط من على السرير ويترقص وهو بيقول "ادينى الشقة بسرعة... أرجوك محتاج القرعة" !!!