مع احترامي

الأضحية يا عمدة

حفيظة: قوم يا هبل يا بو ريالة هات لنا الأضحية فاضل كام يوم علي العيد
عتمان: يا وليه الليالي جيه.. ماعندك الزريبة مليانة جاموس وبقر وخرفان
حفيظة: مش بقولك انت كبرت وخرفت والبت فاطنة كلت عقلك.. الكلام ده كان زمان أيام العز والبغددة.. دلوقت كل شيء بنشتريه مجمد من الجمعية الاستهلاكية وحتي العيش بنجيبه من الفرن
عتمان: يا وليه كلام إيه ده وهو أنا نمت كام سنة
حفيظة: والله ما عارفة المهم الأضحية ل »ادبحك»‬ مكانها وأنا قد قولي
عتمان: يا حفيظ يارب جيب العواقب سليمة.. خلاص قايم أجيب الأضحية بس منين
حفيظة: فاكر أبو العلا اللي انت ضحكت عليه وجبرته إنه يطلق مراته وتجوزتها بقي تاجر كبير.. من خيرك يا هبل من اللي بتسرسبه له فاطنة.. عنده شادر عقبال عندنا مليان جواميس وبقر وخرفان كمان
عتمان: والشادر بتاع الواد المخفي أبو العلا ألاقيه فين
حفيظة: في كل شارع تلاقي زريبة ملانة.. لا بشر ولا عربيات بيعرفوا يعدوا.. روح يمكن جاموسة ترفسك وأخلص منك
عتمان: طيب بس ده خسارة ليه ما ندبح فرخة ولا وزة ولا بطة من بتوع زمان
حفيظة: وزة وبطة وده عاد ينفع للعيد يا عمدة انقطع ندره.. خلي بالك الخرفان قايم ب 38 جنيه في منافذ الزراعة وعند التجار ب 41 جنيه.
عتمان: طيب والله معقولة قوي أروح أجيب خروف من أبو 38 جنيه وآجي
حفيظة: انت اتهبلت يا راجل في خروف في الدنيا دلوقتي ب 38 جنيه بقولك الكيلو فاهم ولا لأ
عرفان: يا لهو بالي الكيلو الواحد دا أنا زمان اشتريت فدادين أرض بأقل منها
حفيظة: يا سلام يا فالح يعني إنت ما سمعتش اللي حصل للجنيه قدام الدولار
عتمان: لأه إيه اللي حصله
حفيظة: اللي يحرسه ويعمر بيته طارق عامر محافظ البنك المركزي عوم الجنيه بقي الدولار الواحد بييجي 9 جنيه رسمي أما السعر الخصوصي في السوق السودة بأكثر من 12 جنيه
عتمان: وده يبقي عومه دا غرقه
حفيظة: ما أنت جاهل تعويم الجنيه مش في الميه دا في الهوا يعني قيمة الجنيه قلت يا أبو عقل بلوظة
عتمان: طيب يا فالحة وإيه علاقة تعويم الجنيه بسعر الخرفان
حفيظة: هو الخرفان بتاكل إيه مش علف أهو غلي سعره عشان بنجيبه من بره وبالدولار
عتمان: با قولك ملعون أبو الدولار لا أبو الجنيه أنا هشتري كام كيلو لحمة وخلاص
حفيظة: وهي اللحمة بقت رخيصة دا الكيلو عند الجزار بأزيد من حته بمية وفي مجمعات الحكومة شغتة وجايبنها من بلاد بره ب 60 جنيه
عتمان: يا حفيظة بقي كيلو اللحمة بميت جنيه طب والله منا رايح هجيب ده كله منين
حفيظة: معرفش اتصرف زي مضيعت فلوسك و100 فدان بتوعي علي الجواز العرفي ده اتصرف وهات الأضحية
عتمان: طب فكري معايا يا حفيظة يا بنت الأصول.. أعمل ايه
حفيظة: نقولك وناكل من بيوتنا.. روح اشتغل عند أبو العلا يمكن يرضي
عتمان: يا عيب الشوم يا حفيظة علي آخر الزمن اشتغل عند المخفي ده والناس تقول علي إيه.. متنسيش اني العمدة برضه
حفيظة: يا راجل العمدة كان زمان.. دلوقت العشرة منهم بقرش
عتمان: لأه لما اموت من الجوع مش هروح للمخفي ده أنا هروح أسوق توك توك أهي مليه الشوارع وبتفوت حتي من علي الرصيف وحتي من فوق الناس
حفيظة: يا راجل بص في المراية هو في توك توك علي مقاسك
عتمان: بتتمسخري علي يا حفيظة طيب أنا قدامك أهه اعمليني أضحية
حفيظة: يفتح الله وهو في حلة علي مقاسك يا ضلالي
عتمان: ياخراب بيتك يا عمدة هلاقيها منين ولا منين فواتير النور ولا الميه ولا لبن الأطفال للواد ابن فاطنة وأنا مفييش حيل أقف في الشمس قدام صيدلية الاسعاف
حفيظة: حد قالك تتجوز علي دا أنا سمعت كلام نظيمة وقعدت تحت القطر وعدي علي عشان أجيب لك الواد
عتمان: قلبك اسود يا حفيظة نامي بقه يمكن ربنا يرزقنا بخروف حتي لو أوزي.. »‬هي حبكت»