بالصور.. سخرية نشطاء مواقع التواصل من «تعويم الجنيه».. يحيى: «لا سنه ولا لياقته يسمحوا بكده».. الهرم: «البرد جاي ممكن يترعش وميرضاش ينزل الميه».. على: «سيب نفسك الدولار هيرفعك».. بيبو: «هيصيف وأنا لا»

عبر نشطاء مواقع التواصل الاجتماعي "فيس بوك" و"تويتر"، عن مخاوفهم من إقدام البنك المركزي على تعويم الجنيه، والذي يعني ترك سعر صرف العملة المحلية يتحدد وفق معطيات العرض والطلب في السوق النقدي، البعض واجه تلك المخاوف بالسخرية، فيما أكد آخرون أن الأمر جاد ولا يتطلب التجاهل وعدم الاهتمام.
مايوه
قال هشام سعيد "إلغاء تعويم الجنيه.. علشان اشترينا له مايوه"، وسخر الهرم "الحكومة لو اتأخرت اكتر من كده في تعويم الجنيه والبرد جاي ممكن الجنيه يترعش منهم وميرضاش ينزل الميه".
وعلق على يحيي " خطة تعويم الجنيه.. سيب نفسك الدولار هيرفعك"، ورد مصطفى الشوبكي "ده ولا سنه ولا لياقته يسمحوا بكده".
وتابع سامي عوف، "تعويم الجنيه تساوي إفقار 20 مليون إضافي بجانب ال40 مليون الفقراء".
زيادة جنونية
وقال شريف البوشي، " ياه لو تم تعويم الجنيه ورفع الدعم عن المحروقات.. كده هنروح سوهاج ب 30 جنيه وكيلو دقيق 10 جنيه وتسافر مصر ب 400 جنيه تذكرة ذهاب والفرخة طازة 100 جنيه ده غير سلع الأساسية المهمة هتزيد أكتر من الضعف.. لأن الدولار هيبقى أقل تقدير 20 جنيه في أول أسبوع.. ياعني يدوبك اللي يكفي بيته في شهر بالعافية محتاج 8 آلاف جنيه... ربنا يستر".
وأضاف محمد الحسيني "تعويم الجنيه.. مش مفيد للشعب مفيد جدًا للاستثمارات والمشاريع وفرص العمل وهايقابلها زيادة جنونية في الأسعار مفيد جدًا لدولة بتصدر مش بتستورد أغلب منتجاتها جهلكم هايغرق الشعب ياسادة".
وعلق سامح صلاح الدين "تعويم الجنيه ملخصه أن البنك المركزي يرفع ايده عن تحديد سعر الجنيه أمام الدولار الأمريكي. يعنى يخللى السعر عايم بالبلدى وبكده سعره الحقيقى يظهر ويتساوى مع المتداول بالسوق الموازى «السوداء».. الهدف منه أن كل اللى بيستغل نقص الدولار بسبب الفرق بين سعر البنك 8.80 والسوق السودا 13.7 يختفى وفى ظل توافر الدولار وقتها السعر بيثبت تلقائى وبينخفض في حالة زيادة الصادرات ودخل السياحة وقناة السويس أو قلة الطلب على الدولار وتقليل الواردات... وكمان ده شرط من شروط الحصول على قرض البنك الدولى لتحرير التجارة العالمية".
وتابع أسعد علام "يعنى بعد حوار تعويم الجنيه ده ممكن تاخد شوال فلوس وانت نازل تشترى شويه هدوم.. قيمه الجنيه هتقل عن كده كمان قدام الدولار".
هيصيف
وسخر بيبو بوي "اللي قهرني من حكايه تعويم الجنيه.. انو هيصيف وأنا لسه مصيفتش".. وقالت منمن "موضوع تعويم الجنيه دا ماشي بمبدأ سيبه والمايه هترفعه".
وعلق محمد نصر "العلاقة بين الجنيه الورق وتعويم الجنيه.. علاقة هامة جدا.. الحكومة هاتعمل بالجنيهات الورق مراكب زى اللى كنا بنعملها في الابتدائي، وتقوم تحطها على وش المية... بس كده يا سيدى، ويا يعوم يا يغرق".
ورد نديم شيمي "تعويم الجنيه إيه... إحنا عايزين نعمله كورس غطس".