فيلم الموسم "كدبة إبريل".. بطولة: مرسى وبديع والشاطر وحمدين والبرادعى

فى فندق فرمونت بمصر الجديدة التقى البرادعى وصباحى بمرسى وبديع والشاطر وقام بديع بالترحيب بهما فاتحا لهما ذراعيه مسلما وحاضنا لهما وقد بادلاه الأحضان والقبلات وهكذا الشاطر واكتفى مرسى بالسلام باليد فقط وجلسوا جميعا على مائدة للحوار.
بديع : ما محبة إلا بعد عداوة.
البرادعى : ومين قال إن احنا أعداء احنا إخوات فى الدين والوطن بس كل واحد فينا بيحب مصر بطريقته.
الشاطر : المهم إننا كلنا بنحب مصر وفدا مصر.
صباحى : فعلا انتوا بتحبوا مصر اللى انتوا حاكمينها ومتمكنين منها وبتأخونوها وبتلغوا كل كياناتها وبتهمشوا كل كفأتها وخبراتها.
مرسى : أهل الأمانه والثقة أفضل من أهل الخبرة والكفأة.
صباحى : إيه دليلك ؟ رئيس وزرائك الفاشل ؟
مرسى : أنا ما اسمحلكش.
صباحى : تسمح لمين وبصفتك ايه انت منظر برفان لما الشاطر يكون موجود والمرشد انت تسكت.
مرسى : ما تنساش انك بتكلم رئيس الجمهورية.
صباحى : انت واهم هى فين الجمهورية دى وعموما أنا ما انتخبتكش ولا البرادعى انتخبك انت انتخبك فصيلك.
الشاطر : اسكت يا مرسى ووحدوا الله.
بديع : احنا جايين نحل مش نتخانق.
البرادعى : قدموا مقترحاتكم نسمعها ونشوف.
الشاطر : نقسم البلد نصين.
صباحى : ما انتوا فعلا قسمتوها.
البرادعى : استنى ياحمدين خلى الشاطر يقول اللى عنده.
صباحى : حاضر يا برادعى.
الشاطر : حنديكم وزارة الكهربا والبترول والبيئة والخارجية والصناعة وحناخد الأوقاف والداخلية والحربية والإعلام والتموين والزراعة.
بديع : وبالنسبه للمحليات خدو قبلى واحنا حناخد بحرى.
صباحى : والشعب حياخد ايه ؟
مرسى : الشعب ياخد بالجزمة.
صباحى : مش ده اللى انتخبك ؟
مرسى : ده عاملى كالو فى دماغى مش عاجبه العجب ولا الصيام فى رجب بعد ما قال يسقط حكم العسكر دلوقتى عاوز ينطرنى ويرجع الجيش والعسكر ده شعب نمرود.
بديع : اهدى يامرسى دى مش طريقة تفاهم سيب الشاطر يكمل كلامه.
مرسى : حاضر ياكبيرنا
البرادعى : ورئاسة الوزرا لمين ؟
الشاطر : ليا أنا.
صباحى : أنا موافق على شرط انكم تقبلوا تغيير الدستور.
الشاطر : نغيره.
البرادعى : والنائب العام ؟
بديع : نغيره.
مرسى : مش عايزين تغيرونى انا كمان ؟
صباحى : ياريت.
مرسى : ده بعيد عن شنبك
صباحى : ركز شويه أنا من غير شنب.
بديع : انتوا حتفضلوا كده زى ناقر ونقير اهدوا شوية خلونا نحلها وكفاية خراب.
صباحى : الخراب ده من صنعكم.
بديع : ما شى ياحمدين من صنعنا وادينا بنحل عاوز ايه تانى ؟
صباحى : عاوز سلامتك.
بديع : الله يسلمك ياسيدى.
البرادعى : ليه تاخدوا الداخلية والحربية والإعلام ؟ احنا ناخد الإعلام.
الشاطر : وتحاربونا بيه ؟
مرسى : الإعلام مرفوض.
الشاطر : كده عدل ربنا شويه علينا وشويه عليكم وخلوا الأمور تمشى.
البرادعى : حناخد التعليم والاتصالات.
بديع : موافقين.
الشاطر : ازاى ياكبير ؟
بديع : مشيها كده علشان خاطر البرادعى.
الشاطر : ماتتكسرلكش كلمة ياكبير موافق.
بديع : حتلموا المتظاهرين.
صباحى : لما انتوا تلموا البلطجية.
الشاطر : نلم.
البرادعى : ولو حد لعب من تحت الترابيزه وكده.
الشاطر : نتعاهد على عدم الخيانة.
صباحى : انتوا مالكمش عهد ده عهدنا بيكم.
بديع : نفتح صفحة جديدة وماحدش يخون حد.
صباحى : الإعلام مناصفة بينا وبينكم ده شرطى يا أما أقوم ونفض الليلة.
مرسى : احنا ما بنتهددش.
بديع : موافقين.
البرادعى : اوعوا تكونوا بتنيمونا.
الشاطر : عيب عليك ده كبيرنا حكم واحنا طوعه.
بديع : نقرأ الفاتحه
البرادعى : نقرأها
الشاطر : وانا حأمر المتر يجيب الأكل علشان يبقى عيش وملح.
صباحى : بس انا حنزل قصاد مرسى فى الانتخابات الرئاسيه الجاية.
بديع : يامين يعيش وعموما ده حقك وانزل والشعب هو اللى حيختار.
الشاطر : الفاتحه
مرسى : ولا الضالين آمين
بديع : لحقت تقراها يامرسى ؟
مرسى : قرتها ياكبير
الشاطر : يلا يامرسى راضى أخوك حمدين وحب على راسه.
مرسى : حاضر ياكومنده أنت تؤمر.
وباس مرسى على راس حمدين والبرادعى باس راس بديع واخدوا بعض بالأحضان وضربوا كباب وكفته وطرب ضانى ونيفه والبلد بقت زى الفل والنفوس هديت واتلمت الليلة.