"متضامن مع باسم يوسف" يهاجم فاشية الإخوان.. إدريس: ورقة التوت سقطت عن الخرفان.. عادل: كده المفروض البلد كلها تبات فى القسم.. جزر: مرسى هايقبض على نص سكان الكرة الأرضية

حالة من الغضب والسخرية أصابت نشطاء تويتر بسبب قرار النائب العام بضبط وإحضار الإعلامى باسم يوسف، ودشنوا هاشتاج "متضامن بكل قوة مع باسم يوسف" الذى اجتذب الكثير من نشطاء تويتر.
الناشط السياسى الدكتور حازم عبدالعظيم "متضامن بكل قوة مع باسم يوسف..وأدين بشدة قرار ضبطه وإحضاره .. ياريت يا باسم بعد كده تسيبك من مرسى وتركز على فاشية الاستعمار الإخوانى مصر".
أحمد الحداد استشهد بكلام الإعلامى عمرو أديب فقال "عمرو أديب: ضبط وإحضار باسم رسالة لنا جميعا إما اعتدلنا أو اعتقلنا ..متضامن بكل قوة مع باسم يوسف".
وقالت حبيبة "متضامنة بكل قوة مع باسم يوسف عشان إحنا قومنا بثورة ضد قمع النظام السابق دلوقتى الإخوان عايزين يخرسوا الشعب المصرى".
وقال غواص فى بحر الويب "أنا المهرج، خفتوا ليه، قمتوا ليه.. لا فى إيدى سيف ولا تحت منى فرس، وعجبى متضامن بكل قوة مع باسم يوسف".
وقال georgeadly "متضامن بكل قوة مع باسم يوسف يعنى كده أول صوباع الريس هايقطعه هو باسم يوسف! طلع باسم يوسف هو الصباع اللى بيلعب فى مصر".
وقال الناشط حسين أى من السعودية "متضامن بكل قوة مع باسم يوسف عندى فكرة نجيب باسم السعودية ويعمل لينا برنامج البرنامج ويعمل للحكومة هنا مثل الإخوان وش رايكم؟ ليش بعض الحكوميين بالخليج بيتضامنوا مع باسم يوسف؟".
زهير البركاتى قال "متضامن بكل قوة مع باسم يوسف حاول نقل التجربة الأمريكية وغاب عنه أن ديوقراطية الشيطان الأكبر تموت فى بلاد الملائكة".
وقال خالد "الشعب السعودى والخليجى متضامن بكل قوة مع باسم يوسف ونقول إن الأنظمة الفاشية تأكل بعضها بعضا فصبرا آل كنانة إن موعدكم الحرية".
وقالت سما خالد "متضامن بكل قوة مع باسم يوسف المدعو ب"أبو إسلام " فين أمر ضبطه وإحضاره يا خروف".
وقال يسرى إدريس "متضامن بكل قوة مع باسم يوسف لأن ورقة التوت سقطت عن ... من خانوا وباعوا الوطن ....لأنى لا أقبل بحكم الخرفان".
وقالت علا عادل "متضامنة بكل قوة مع باسم يوسف على كده المفروض البلد كلها تبات فى القسم بقى! وأطالب بالتحقيق مع مرسى بتهمة إهانة فكرة ومنصب الرئيس".
وقالت هبة الله "متضامنة بكل قوة مع باسم يوسف علشان لو الموضوع فيه عدل يبقى زى ما هو هيتحقق معاه .. نحقق مع المتأسلمين بتهمة إهانة الثوار علشان لو على إهانة الرئيس يبقى يلا كلنا يتحقق معانا."
محمد عزت قال "متضامن بكل قوة مع باسم يوسف المفروض باسم يوسف يقول لنائب العام انت اشتغلى إيه؟".
عائشة الجيار قالت "متضامنة بكل قوة مع باسم يوسف طيب مش نائب الإخوان الملاكى صدر أن تعيينه غير قانونى! هى الناس عايشة فى دولة الإخوان ولا فى مصر إخوان كاذبون".
وقالت Асма "متضامنة بكل قوة مع باسم يوسف ازدراء الدين؟! إنه دين بالضبط؟! الإسلامى وإلا الإخوانى؟؟ واخدلى بالك يعنى؟!! تجار الدين الإخوان".
وقال هشام واحد من الناس "متضامن بكل قوة مع باسم يوسف للدرجة دى برنامج ساعة كل أسبوع حيموتكوا من الغيظ ده انتو طلعتوا غلابة أوى شوفوا الفولور بتوع باسم وبتوع مرسى!!".
وقال أسامة سولا "متضامن بكل قوة مع باسم يوسف كل حر تونسى متضامن معك دكتور، معا لإسقاط الفاشية والدكتاتورية الناشئة فى بلادنا".
وقال أحمد المهدى "متضامن بكل قوة مع باسم يوسف القرار لا يجدى يوجد آلاف باسم يوسف.. لم يقل إلا الموجود".
وقال أحمد جزر "مرسى لو عمل ضبط وإحضار لكل اللى بيهينوه، فى الغالب هايقبض على نص سكان الكرة الأرضية هو مرسى مصدق نفسه إنه رئيس فعلا!!".