وزير الرياضة: «معرفش حاجة عن استضافة مصر لأوليمبياد 2032»

قال المهندس خالد عبد العزيز، وزير الشباب والرياضة، إنه لا يعلم شيئًا عن الكلام المثار من لجنة شباب والرياضة بمجلس النواب عن استضافة مصر لدورة الألعاب الأوليمبية 2032.
وأضاف وزير الرياضة، للإعلامي إبراهيم فايق، ببرنامجه "ملعب 9090"، على إذاعة الراديو 9090: اليوم الإثنين، قائلًا: "أنا دايما متعود على الشفافية، مكنش فيه تنسيق بين لجنة الشباب والرياضة في الكلام ده، ولو مصر قدمت ملفها لاستضافة هذه الدورة، يعنى مش هيكون قبل سنة 2024، يعنى أغلب المسئولين اللى موجودين دلوقتى مش هيكونوا موجودين".
وتابع وزير الرياضة: "لكن برضو لازم نكون مستعدين لكل حاجة، يكون عندنا خطة واضحة، وتكون عند قواعد واضحة، يعنى وقت ما نبنى أي منشأة رياضة نراعى فيها استضافة بطولة عالمية، ونحاول بقدر الإمكان أننا نبنيها بالقرب من المطارات، يعنى اللى أقصده بالكلام ده أن يكون هناك تخطيط وتنسيق بين جميع الجهات، حتى تكون هذه المنشآت صالحة لاستقبال البطولات العالمية".
وأضاف عبد العزيز: "عملنا أكتر من 2600 ملعب على مستوى الجمهورية، وقبل نهاية السنة دى هيكون انتهينا من إنشاء 3000 ملعب، وفى نهاية شهر سبتمر المقبل في 2017 هيكون عندنا 4000 ملعب، وده من المشاريع العملاقة اللى طالب بيها الرئيس عبد الفتاح السيسي".