نشطاء يدشنون هاشتاج «الأسعار نار والجنيه بينهار».. أحمد: «الحياة مرة».. محمود: «الغلابة بيصرخوا ليل ونهار».. أسماء: «الجنيه عمل حادثة».. توني: «الجنيه زمان كان بيساوي جنيه دهب دلوقتي باكو بسكويت»

دشن نشطاء مواقع التواصل الاجتماعي "فيس بوك وتويتر" هاشتاج "الأسعار نار والجنيه بينهار"، الذي حقق مركزا متقدما على "تويتر"، واستغاث النشطاء من زيادة الأسعار وانخفاض سعر الجنيه مقابل الدولار، فيما قدم البعض حلولًا غير مسبوقة وساخرة، إما باستبدال الجنيه بالدولار أو التعامل بالعشرة جنيهات بدلًا من الجنيه.
"الحياة مرة"
وقال "عمرو"،: "الأسعار نار والجنيه بينهار.. هل مكاتب الصرافة كانت تعلم بما سيحدث للجنيه؟ ومن أين لها تريليونات الجنيهات التي استبدلت بها الدولار؟"، وأضاف سمير والي:"مصر بتقول لكم... الأسعار نار والجنيه بينهار".
وتابع أحمد الطيار:"الحياة بقت مرة والعسل بقى جبنة.. الأسعار نار والجنيه بينهار"، وقال توني سمير:"سنة 1940 الجنيه المصري گان يساوي جنيه دهب.. 2016 الجنيه المصري يساوي باكو بسكويت.. الأسعار نار والجنيه بينهار".
"عمل حادثة"
وقال عبد الله شرشبيل:"اللي بيرزقنا في الرخص هو اللي يرزقنا في الغلاء.. لنا الله الأسعار نار والجنيه بينهار"، وأضاف محمود البحيري:"لسه لأسعار نار والجنيه بينهار والغلابة بيصرخوا بالليل والنهار".
وأضاف هشام سلامة: "الصحف: هبوط حاد للدولار ليصل إلى 11 جنيها.. ميه بسكر بسرعة ياجماعة الراجل هيموت مننا.. الأسعار نار والجنيه بينهار".
وردت أسماء سومة:"محدش يقول على الجنيه إنه بينهار ابدا.. هو عمل حادثة وخد 13 ونص غرزة.. الأسعار نار والجنيه بينهار"، وتابع سراج سليم: "الحكومة قاعدة كده وخلاص ولا بتتحرك، وهنفضل كده كتير، ومش هنتقدم خالص.. الأسعار نار والجنيه بينهار".
البنك المركزي
وقال محمد العبيد: "الجنيه ممكن يلغوه وتبقى العملة الرسمية لمصر هي ال10 جنيه وبكده هنشحت كلنا.. الأسعار نار والجنيه بينهار".
وأضافت أمل المظلوم: "روحت ب700 جنيه اشتري هدوم البت والواد.. طقم الواد بالحذاء400 جنيه..سألت على فستان عجبني للبت ب 390 جنيه ولسه الحذاء.. الأسعار نار والجنيه بينهار".
ورد محمد العجمي: "لم يفعل عمر بن عبد العزيز سوى أنه أغلق على الفاسدين أبواب الفساد وعدل بين الرعية، خصلتان كانتا سببا في ازدهار دولته.. الأسعار نار والجنيه بينهار".
وتابع على رعد: " قريبا.. لو سمحت عايزة ب200 جنيه فول وب 500 جنيه عيش.. الأسعار نار والجنيه بينهار"، وقال "شبيه الريح ":"حتى العيال الصغيرة مش عاوزة الجنيه عاوزين 10جنيه.. هي العيال دي عرفت سعر الدولار.. الأسعار نار والجنيه بينهار".
وأضافت نبيلة فريد: "يا ريت بس الإخوان يمتنعوا والنبي علشان هم أصل الخيبة اللى إحنا فيها.. في ناس مش محتاجة جنيه ولا دولار دول محتاجين يشربوا كلور علشان ينضفوا من جوه.. الأسعار نار والجنيه بينهار".
وعلق مصطفى وليد قائلا: "اشتريت كيلو عدس من بتاع الغلابة الأسبوع اللي فات ب 15 جنيها ،اشتريه امبارح ب 16 جنيها يعني زيادة تقريبا 9% في أسبوع.. الأسعار نار والجنيه بينهار".