بختك اليوم "الخميس " من هريدى نيوز

يا تكون محظوظ يا تكون منحوس ..حظك عندنا فى هريدى نيوز.. ولو بختك طلع مايل ..أوعى تضرب بوز .
الحمل
من فات قديمه تاه ..ارجع لأصلك وما تسمحش إن حد يفكلك صواميل مخك .أى خلافات هتتحل .
صحيا : ماله الفول بالبيض.. مش أحسن من الفلافل بالأيس كريم ؟!!
الثور
جرب نار الغيرة .. جرب وقول لحبيبك أيه رأيك.. بلاش تلبس أعلنت إشارات ضبط دماغك انتهاء أعياد "الفلانتين "
صحيا : اللى يخاف من السكر و الملح ينفخ فى أى حاجة بيضا .. فوبيا الدقيق !!
الجوزاء
أنت صحيح صاحب الكورة بس ده مش معناه أن من حقك تختار الفرقتين اللى هيلعبوا ..أنت هتلعب فى فريق واحد غالب ولازم يكون فيه مغلوب.
صحيا : الصين حلوة والشمس كمان حلوة بس بتجيب ضربة شمس .
السرطان
الوقت كالسيف إن لم تقطعه أنت قطعه ابن عمك أو ابن خالتك أو أى حد من العيلة .. شوية دراما بقى عشان ملح الحياة يتظبط.
صحيا : هتنسى تاكل واحتمال تنسى تشرب ..خلى بالك من زمزيتك.
الأسد
تصقيفة أمال .. تشجيعة أمال ..عمرك ما بتنسى انك اسد ومحتاج لنفخ ذاتك و ملو تنك غرورك.
صحيا : لو فيه مسابقة ملوك وملكات جمال هيكون الأسد النهاردة هو الفائز.
العذراء
هات ازازة حاجة ساقعة .. رجها كويس .. (لا ما تفتحهاش ) اتصور جمبها وعبر عن نفسك.
صحيا: نم مبكرا واستيقظ مبكرا عشان تلحق تقف فى طابور العيش.
الميزان
الجيران زهقوا من جرجرة العفش .. فكر مرة أخيرة فى أخر تغيير فى البيت الشهر ده وركز فى الشغل بدل ما يتخلصوا منك فى بير السلم.
صحيا : قد يحدث انزلاق فى المعاميع وتضخم فى البلعوم.
العقرب
لو أنك تعرف أن البحر عميق جدا .. كنت خدت معاك مايوه أكيد .. الحب مش سهل والحياة مش شط ومايوه.
صحيا : حر .. برد .. حر.. برد ..جو زى حال بلدنا .. وأنت لازم تعيش زيه بشعرة ساعة تروح وساعة تيجى.
القوس
امسك سماعة التليفون .. اتكلم ولف حوالين نفسك.. المرة دى ممكن تجيب نتيجة ولو حسيت بدوخة ما تقلقش ده طبيعى فى الأشهر الأولى.
صحيا : تجنب البطاطا والبطيخ لأنهم بيجيبوا غباء .. وتجنب المشمش لأنه ما بيجيش من وراه خير.
الجدى
البرج المتأنق لهذا اليوم ..لازم تلبس حرير فى حرير وتدلع نفسك النهاردة يومك وانت ملك الأبراج.
صحيا : لو دامت لغيرك ما وصلت إليك وافتكر إنك سبت الحنفية وانت بتغسل ايديك.
الدلو
عقدة "المشاكل" اتحلت .. وحبيبك بدأ يرضى عنك .. ولع 50 شمعة ادام سيدى "المرسى " واتمنى النهضة ما تحلش عليك.
صحيا : قلبك ضعيف ..كبد وكلاوى "عبده نتانة" هتخلى قلبك قلب أسد "لو فضل ".
الحوت
هتلعب دور "جيفارا" او "غاندى " أو "بوحة " المهم النهاردة دور النضال والبطولة ليك ومن إخراجك.
صحيا : اجرى اجرى اجرى .. الاتوبيس يساعد على التخلص من السمنة.