رضوى إبراهيم تكتب: «ابنك على ما تربيه وجوزك على ما تعوديه»

مثل قديم ولما حد بيسمعه الأيام دي بيضحك ويقول لا الابن بيتربى ولا الراجل بيتعود!
-إزاي بس لا الابن بيتربى ولا الراجل بيتعود؟! دي كارثة.
-آه والله زي ما بقولك كدا الستات تعبت لأن العيال المدرسة والشارع هما اللي بيربوهم، والراجل أمه بتبقى مربياه وجاى لمراته جاهز، واللي كان كان.
- الله يعني الراجل كان طفل وأمه اللي ربته وعودته ؟!
- مممممممم.
- من غير مممممم تعالي هنا... إنتي اللي قولتيلي مش أنا
-أنا عارفه بقى هما اللي كانوا بيقولولنا كدا
- هي دي الزتونة... هما اللي قالولي... هما مين بقى؟!
- ممممممم... هما... أهالينا
- إنتِ مقتنعة بالكلام اللي ملهوش معنى دا؟!
- ما هو أنا شايفة قدامي ابني مجنني ومش بيسمع الكلام وجوزي تاعبني برضه.
- علشان إنتي حافظة مش فاهمة... أخدتي الكلام من ماما وتيزه وصاحبتك وبنت خالتك وبنت الجيران اللي هما أصلا جايبين الكلام دا من ناس تانية والناس التانية جايبينه من ناس تانية وهكذا لحد ما توصل لأصل الحكاية من قديم الأزل إن كان في واحدة عندها مشكلة أو منفسنة أو خايفة من الحسد، لكن مش دي الحقيقة خالص.
الحقيقة إن ابنك تقدري تربيه كويس وبالأصول وجوزك تقدري تعوديه على الأصول مش تعوديه على طبعك، آه (كلام ماما وكده يعني) المهم ما علينا، لو كل ست ربت ابنها بما يرضي الله وعلى إن أقصر طريق هو الخط المستقيم، والصح صح والغلط عمره ما كان نسبي، إحنا اللي حطينا النسبة والتناسب لكن الحقيقة الصح والغلط محدش بيختلف عليه.
الابن دا هيكبر وهيتجوز ومش هيتعب مراته، هيقولوا عليه ونعم التربية تسلم اللي ربت، ملك بن أميرة، ولحد لما دا يحصل وكل أم تنتبه يعني إيه تربية سليمة، التربية السليمة مش إن إبنك يكون قاعد في وسط ناس مؤدب أدب القرود ولا يكون شاطر وبس.
التربية السليمة إنه يفهم دينه صح، إنك تسمعيه لما يقول رأيه، يبقى صاحب قرار وحلم، إنك لما تقوليله: لأ، تقوليله قولتي لأ ليه وتقنعيه وتسمعيه.
تعليمه إن الست نص المجتمع اللي بيبني ويعلم النص التاني مش مجرد كمالة عدد، إن مش من الرجولة إنك تلعب ببنات الناس ولا الرجولة إنك تمشي مع نص بنات البلد، عوديه يفكر ويشغل مخه.
لحد ما دا يحصل وربنا كرمك واتجوزتي اعرفي إنك مش داخلة خناقة، وإنك لازم تعوديه على طبعك، لأ إنتي هتعوديه على الأصول والصح، تحترميه هتجبريه إنه يحترمك، شجعيه على النجاح هيقدرك، إديله رسايل غير مباشرة إن ربنا دايما شايفنا، هيخاف يبص على أي بنت لكن خوف مش منك خوف من ربنا اللي أقوى منك ومنه، صلي قدامه هيتكسف وهيتغير وهيصلي، أوعي تديله الأمان لحد ما يحكيلك وبعدين تديله بشبشب زيكو، وحبي نفسك وشكلك واهتمي بيها علشان هو يحب نفسه وشكله ويهتم بيها.
وبلاش حركات الستات، عايزة جوزك ميهتمش بنفسه خايفة عليه يتسرق؟ صدقيني مفيش راجل بيتسرق، اهتمي بشكله وبمنظره علشانك إنتي وعلشان هو يفرح بيكي إنك عايزاه أحسن الناس شكلا وموضوعا.