باسم يوسف للإخوان: السخرية من «مرسي» جزء من الديمقراطية

هاجم الإعلامي الساخر باسم يوسف جماعة الإخوان، مؤكدًا أنه غير نادم على مهاجمة الرئيس المعزول محمد مرسي، وأن انتقاده ل"مرسي" أثناء فترة حكمه لمصر هو أحد أشكال الديمقراطية.
وكتب باسم يوسف تدوينة على "فيس بوك" قال فيها: "الحقيقة انا ما كنتش عايز افتح المواضيع دي عشان مش وقتها لكن للأسف كل يوم بيخش علينا ناس من الإخوان ويفضلوا يرازوا فينا ويزايدوا على اللي جابونا ويلوموا علينا خطايا الدنيا والآخرة".
وأضاف:" لما الواحد بيرد ناس تقولك مش وقته والمفروض ما نعضش في بعض والكلام الحمضان ده، لكن بما انكم بتعضوا فيا وفي ناس تانية كل يوم أنا قررت اكتب بوست طويل عريض ارد فيه على كل الترهات والهجوم بتاعهم عشان نخلص وعشان برضة اللي يحب يرد عليهم يستخدم البوست ده لاني بصراحة مش فاضي لكل حد ييجي يكرر نفس الكلام".
وقال باسم يوسف ردًا على هجوم الإخوان:"نبتدي مع بعض.. انت مش ندمان انك هاجمت الرئيس الديموقراطي؟ مش حاسس بذنب انك هاجمت التجربة الديموقراطية المصرية الوحيدة؟.. سؤال مكرر ومعاد وفارغ من المضمون".
وأضاف:"ماهي يا حبيبي الديموقراطية هي اللي جابته، وجزء من الديموقراطية أنه يطلع عين أهله لما يوصل للسلطة، والناس تهاجمه بل وتفتري عليه كمان بحق ومن غير حق".
وتابع:"الديموقراطية لو ابتديت تحطلها ضوابط تقول إيه وماتقولش أيه ما بقتش ديموقراطية.. يعني رئيس جه بطريقة ديموقراطية ما ينفعش يمن على اللي خلفونا أنه ديموقراطي فاسكت وهس وبس.. فهمت؟ يعني وصوله للسلطة وهجومي عليه هي دي الديموقراطية".
وقال:"ويا ريت ما ننساش أن لما انا كنا باهاجمه واتريق عليه كانت وسائل الاعلام الإسلامية اللي المفروض إسلامية كانت بتهاجمني بشكل يومي 24 ساعة وتتهمني في عرضي وفي عيلتي وفي شرفي وبيقولوا عليا شاذ وخاين وعميل وكافر بل وبيحرضوا على قتلي.. فأنا استخدمت الديموقراطية عشان السخرية وأنتم استخدمتم الديموقراطية للتحريض على القتل والخوض في الأعراض يا مسلمين يا متدينين".
وعلق: "أنا مش فاكر مثلا إني خضت في عرض مرسي أو شهرت بيه ولو البرنيطة الكبيرة أو فيديو القصاص ده بقى اللي واجعكم قوي يبقى شوفوا الأول ساعات البذاءة والقذارة اللي كانت بتحفل بيها قنوات الحافظ والناس ومصر 25".