بالصور.. أطرف مواقف الأطفال.. محمود: «أخويا قال للمدرِسة اهدى يا منار».. نهلة: «أختى بتغنى لجوزها في الحضانة».. سوزان: «أختى بتقول اللهم احفظ النعمة من الزواج».. وخالد: «طفل بيقول لأهله إنكم مجرمون»

روى رواد موقع التواصل الاجتماعى "فيس بوك"، أطرف مواقف الأطفال عبر صفحة "الكومنت الفصيل"، والتي ظهرت خلالها براءة الأطفال، وكيف يستوعب عقلهم ما يستوعبه الكبار على طريقتهم الخاصة، ومن بين تلك المواقف.
اهدى يا منار
قال محمود: "ابن أخويا قعدو سنة يقنعوه يروح الحضانة، وفي أول يوم راح لاقى الميس متعصبة أوى وبتزعق للعيال، وفجأة يقولها اهدى يا منار اهدى يا منار، فطست ضحك مرة واحدة، ومن وقتها مرجعش الحضانة".
إنكم مجرمون
وروى خالد: "عادى.. ولد صغير حفظ صورة المرسلات.. كل لما يشوف أهله قعدوا يأكلوا كان يقولهم: "كلوا وتمتعوا قليلا إنكم مجرمون".
«جوزي بقى أراجوزي»
وتذكرت نهلة: "أختى أما كانت في حضانة كانت ترجع تغني نشيد، وتقول أنا جوزى سكرة مناخيرة مدورة وعيونه مثلثات وخدوده أحمرة، فلما سمعتها قلت لماما جواز إيه اللى بيعلموه للعيال في الحضانة، واكتشفنا أن الأغنية هي اراجوزى سكرة وأختى بتسمعها غلط".
«هقعد عالبلاط»
وأضافت مروة: "أخويا الصغير زمان سمعته بيعاتب ماما بيقولها ياماما إنتى ليه مجبتنيش أنا الأول ليه خلفتيني آخر واحد، فماما قالتله يا حبيبي أنت موقفتش في الطابور ليه من الأول، قالها والله وقفت أول واحد بس أنتوا فتحتوا من الناحية التانية".
وقالت يمنى: "خالتى بتقول لبنت خالتى الصغيرة لو عايزين نبني بيت في الجنة، نقول قل هو الله الأحد 3 مرات، راحت قالتلها الله طيب هقولها وفعلا قالت، فخالتى قالتلها طيب لو عايزين نزين البيت نقول سبحان الله وبحمده 100 مرة، ردت عليها وقالتلها لا أنا مش عايزة أزينه، أنا هقعد على البلاط بمنتهى العفوية".
«اللهم أدمها نعمة واحفظها من الزواج»
وأضاف خالد: "أحسن من اللى جاي من الحضانة بقوله أخدت آية الكرسي قالى أيوه قولتله سمعها.. قالي بنجيب كرسي ونحطه في النص ونجرى واللى يقعد في الأول يكسب".
وروت سوزان: "عادى أنا أختى الصغيرة بعد الأكل تقول اللهم ديمها نعمة واحفظها من الزواج".
«كفرانك»
وقالت دعاء: "واحد راجع من الحضانة فبيقول لأبوه إحنا اتعلمنا النهاردة دعاء الخروج من الحمام.. قاله طب قوله قاله كفرانك، قاله يابنى ده دعاء الخروج من الملة".
الشيطان الظريف
وأضاف أحمد: "طفل صغير في الحضانة لما رجع البيت الأخ الكبير بيقول عايز أشرب، جري بسرعة الولد الصغير وجابله مايه، ودا شيء مش طبيعي لما الأخ الكبير سأله الولد قاله أخدت في الحضانة اللى يسقى كلبا يدخل الجنة".
وروى فارس: "أنا أخويا اللى فأولى ابتدائي أول حصة دين ليه.. رجع البيت سمعتو بيقول لأمي انو لما يكبر هيبقى نبي عشان النبي راجل كويس".
وقالت ندى:"لا خد دى بقي أخو صحبتى أول ما ابتدى يأخد قرآن كان بيقول أعوذ بالله من الشيطان الظريف".
سبايدر مان
وروت أميرة: "ابنى وهو مروح من الحضانة عيط قالى الميس مرضيتش تخليني أكل الشوز بتاعى.. قولتله دا مش بيتاكل دا بيتلبس في رجلنا يقولى لا ويعيط أنا عايز أكل الشوز، المهم حايتله عشان يبطل عياط ببص في شنطته لقيت الساندويتشات والعصير، قولتله أنت مفطرتش ليه، قالى ما أنا عمال أقولك الميس مرضتش تخلينى أكل الشوز.. المهم اكتشفت أن المقصود الجوس "العصير".
وأضافت علا: "ابنى مكنش بيرضى يقول بسم الله قبل الأكل ويرفض، وكأنى بدعيه للإسلام وهو من قريش مثلا، المهم لما وافق بقي يقولها خطف كده وسريعة، بس لما ركزت معاه اكتشفت أنه بيقول سبايدر مان".