لأنك صحفي.. ربع ساعة تحقيق في محطة مترو شبرا

استمرارا لانتهاكات بعض رجال الأمن بحق الصحفيين، استوقف ضباط مباحث محطة مترو شبرا الخيمة الزميل "أحمد العامري"، محرر الديسك ببوابة الوفد الإلكترونية، بدعوى الاشتباه، وبتفتيشه لم يحصل الضابط على شيء مخالف، إلا أنه لم يسمح له بالانصراف ليصطحبه إلى مكتب الشرطة.
وفي المكتب داخل المحطة: "كعادتي دخلت محطة شبرا الخيمة ورايح عشان أجيب التذكرة، فوجئت بأن أحد الاشخاص يستوقفني، وبيقولي البطاقة، قولتله نعم قالي بطاقتك يا كابتن، فقولتله ليه قالي مباحث، المهم لقيته موقف حوالي 5 شباب غيري وفي ايديه بطاقتهم، طلعتله البطاقة، وقالي شغال فين قولتله صحفي قالي فين يعني قولتله في جريدة الوفد واول ما سمع كده فقالي تعالى ورايا قولتله على فين قالي على مكتب الشرطة".
وتابع: "دخلت أنا والشباب مكتب الشرطة لقيت واحد تاني خالص غير اللي وقفني بره قاعد على مكتب وبيناديني باسمي، المهم أنا أول واحد اتحقق معايا بالرغم من كوني أخر واحد متاخد، فلقيت الشخص التاني بيقولي اسمك قولتله ما انت لسه مناديني بيه فقالي انت هتهزر معايا قولتله أحمد قالي بالكامل قولتله يابشا على فكرة البطاقة في ايديك وممكن تشوف فيها اللي حضرتك عاوزه، شغال فين يا أحمد قولتله في جريدة الوفد، وأول ما قولتله كده هوا كمان قالي طب فضي شنطتك أدامي على المكتب، ومكتفاش بكد وأخد الشنطة بعد ما فضيت حاجتي على المكتب وفتشها، وبعدين فتشني أنا شخصيًا تفتيش ذاتي، وللأسف كانت من ضمن الاشياء الموجودة داخل الشنطة دوا للبرد، فقالي إيه ده، وشايله ليه، فقولتله ده للبرد وممكن حضرتك تتأكد، أخدها وقعد يقرا ال مكتوب عليها".
وأردف: "وكان أول سؤال اتسألي بعد ما شاف البطاقة، انت من ههيا يا أحمد قولتله أيوه فقالي مش دي تقريبًا مدينة محمد مرسي قولتله أيوه، طب فين إثباتك انك شغال في جريدة الوفد، المهم التحقيق معايا أخد تقريبًا ربع ساعه، وال 5 اللي كانوا معايا التحقيق معاهم مااخدش مع كل واحد منهم غير دقيقة أو اتنين بالكتير أوي، وفي الآخر قالي لم حاجتك واتوكل على الله، زي ما تكون الصحافة بقت من المحرمات".