كاتب صحفي: «مين يحاسب الباشا اللي قتل شاب على كوباية شاي؟!»

أكد الكاتب الصحفي محمد الجارحي، أن أمين شرطة، بمدينة الرحاب بالتجمع الخامس، قتل شابًا بسبب رفض أمين الشرطة دفع ثمن كوب من الشاي للشاب، وعند مطالبة الشاب له بدفع الثمن قتله.
واتهم الجارحي الشرطة بالتآمر وقتل الشباب ال"غلبان" في الشوارع، وأشار إلى أن التبرير الذي يتلقاه الشعب المصري أنها "أخطاء فردية".
وكتب محمد الجارحي تدوينة على "فيس بوك": "أمين شرطة قتل مواطن أعزل بالقرب من مدينة الرحاب النهاردة الصبح، والنَّاس كانت هتاكله، رمى سلاحه وهرب منهم، والأهالي كسروا عربية الشرطة".
وأضاف: "الشاب اللي اتقتل كان ضمن 3 شباب اضرب عليهم النار.. تفتكروا الباشا أمين الشرطة عمل ده ليه؟.. علشان كوباية شاي.. أيوه كوباية شاي رفض يدفع حسابها لولد شاب غلبان واقف يعمل شاي للعمال والصنايعية في المنطقة دي.. الكلام ده اللي قاله شهود عيان في المنطقة هناك.. شاب طالع يأكل عيش بشرف، قام الباشا قرر يرجعه لأهله جثة".
وتابع الجارحي: "السؤال بقى دلوقتي مين يحاسب الباشا؟ كل كام يوم مواطن غلبان يتقتل بدون ذنب ودمه يروح هدر، انتم اللي بتصنعوا المؤامرة بأفعالكم وجرائمكم كل يوم، المتآمر الحقيقي هو اللي بيقتل الناس في الشارع كده على عينك يا تاجر، المتآمر الحقيقي هو اللي بيبرر جرائم القتل ويقول عليها أخطاء فردية، المتآمر الحقيقي هو اللي بيبلطج على الشعب ليل نهار لحد ما الشعب يفقد أعصابه ويفرمه".
وقال: "المتآمر الحقيقي اللي سايب شغلانته الأساسية في توفير الأمن للناس وماشي يقتل في الناس، المتآمر الحقيقي اللي ما استوعبش لحد النهاردة درس 25 يناير 2011، الشعب ممكن يعديها مرة واتنين وتلاتة بس مش هيعديها على طول".