بالصور.. بطل السومو المصري يروي موقفا مؤثرا مع طفل مصاب بالسرطان

تعرض البطل المصرى المصنف الرابع عالميا في رياضة السومو، عبد الرحمن شعلان، الذي استقبله الرئيس عبد الفتاح السيسي بطوكيو، لموقف جعله يشعر بالسعادة والرغبة في تحقيق مزيد من النجاح.
وقال «شعلان»، عبر صفحته الشخصية بموقع التواصل الاجتماعى «فيس بوك»: «موقف حصل معايا امبارح فرق معايا ل10 سنين قدام.. كنت معزوم عالعشا امبارح فالطفل دا كان ابن حد من الضيوف ومكنش مصدق أول ما أنا دخلت وبالصدفة كان المكان اللي أنا هقعد فيه قدامه في الناحية التانية من الترابيزة وفضل يبصلي جامد وفجأة ابتسم وشاورلي فشاورت له قلت له تعالي اقعد على رجلي.. جه وقعد وقالي عاوز أقولك على حاجه.. أنا بحبك أوي أوي وأنا فرحان إني شوفتك، وكل لما أشوف ماتشاتك أو أشوفك في التليفزيون بكون فرحان وبتشجع آخد الدوا».
وأضاف البطل المصرى قائلا: «فسألته أنت تعبان!؟... قالي أيوه أنا عندي سرطان والدوا وحش أوي وبيتعبني وفضلت الفترة اللي أنت كنت مصاب وملعبتش فيها ما باخدش الدوا ولما رجعت وأخدت البطولة أنا كنت مبسوط أوي وبقيت باخد الدوا أحسن من الأول عشان أكبر وأبقى قوي زيك كدا، طفل زي دا يخليني أنحت في الصخر عشان بس أشوف الفرحة في عيونه زي ما شفتها امبارح.. ربنا يشفيه يارب».
يذكر أن عبد الرحمن شعلان ولد في 10 فبراير 1992 بمحافظة الدقهلية، وهو مصارع سومو محترف يعرف باسم «أووسونا-أراشي كينتارو»، ويعتبر أول مصارع سومو أفريقي الأصل وأول مصارع مسلم يصل إلى دوري الاحتراف.