موقف كوميدي لمواطن مع سيارات نقل الناخبين التابعة لحزب النور

تداول مستخدمو مواقع التواصل الاجتماعى «فيس بوك»، موقفًا طريفًا لمواطن مع مسئولي سيارات حزب النور التي تنقل الناخبين بالمخالفة لقرارات اللجنة العليا للانتخابات.
وقال أحد نشطاء «فيس بوك»: «حزب النور كان جايب عربيات وبيلفوا على الناس في البيوت عشان لو مكسلين ينزلوا.. يعنى يتشجعوا لما يلاقوا مواصلة رايح جاى.. وهو ماشيين بيتنشقوا على أي حد يروح معاهم يديهم صوته.. المهم اتكعبلوا في واحد حبيبي من اللى بيشربوا سجاير صينى فركب معاهم وقالهم بس أنتوا لسه هتستنوا العربية تتملى ناس وأنا مستعجل يا جدعان !.. قالوله خلاص خليك هنوديك لوحدك كدا كدا العملية خفيفة خالص.
وأضاف: «المهم خدوه ونزلوه عند المدرسة وقالوله خش بقى وأحنا مستنيينك هنا.. قالهم ماشى ولف راح الكشك جاب علبة سجاير ورجع.. فقالوله أيه رجعت ليه ؟.. قالهم معلش شكلى نسيت البطاقة.. ممكن حد يرجعنى أجيبها وأجى تانى بسرعة.. قالوله اتفضل يا أخى جل من لا يسهو.. وبعد لما وصلوه لحد البيت نزل وقالهم جزاكم الله خيرا يا إخواني.. أتكلوا على الله انتم بقى.. قاله وأنت ؟.. قاله: الصراحة أنا كنت نازل أجيب سجاير ومالقيتش توك توك ولقيتك فاضى فقولت مصلحه»، ما أثار موجة من السخرية بين نشطاء «فيس بوك».