بالصور.. شاب يخصص سيارته لتوصيل المرضى وكبار السن مجانًا

تجربة إنسانية جسدها أحد سكان مدينة طنطا، حيث قام بتخصيص يوم للمساعدة في توصيل المرضي وكبار السن مجانًا، وذلك ما رواه المحاسب رامي السخاوي، أحد القاطنين بمدينة طنطا.
وروى السخاوي تدوينة على فيس بوك فقال: "النموذج ده يا جماعة لشاب إيجابى، النهاردة كنت في مستشفى المجمع الطبى التابعة للتأمين الصحى بشارع البحر بطنطا. وطبعا تابعة للتأمين الصحى يعنى معظم اللى بيروحوها من محدودى الدخل".
واستطرد رامي السخاوي "وأنا واقف شوفت إزاى التاكسى بيتأمر على الناس، وإزاى بينقى مشواره، وإزاى بينقى الزبون... وشوفت الميكروباص اللى بيقف في وسط الشارع ويعطل المرور ولو واحد كبير في السن بيحاول يحصله يسيبه ويمشى... وشوفت إزاى المستشفى دى واخدة شهادات جودة عشان الالتزام... وأمن على كل باب لمنع دخول ذوى المرضى، ورغم كدة مفيش حتى تاندة ولا شجرة يتظللوا فيها. واللى معاه عربية يتظلل فيها على طول المرور ييجى يكلبشهاله أو يمشيه".
وقال "وكمان شوفت شئ غريب على مجتمعنا شوفت الراجل اللى في الصورة ده كتب ورقة على عربيته (يا رجال المرور.... هذه سيارتى الملاكى... وهبت اليوم لعمل إنسانى.... توصيل المرضى وكبار السن... فاسمحوا لى بذلك.... شكرا لكم)
وأضاف السخاوي "هو ده اللى البلد محتاجاه فعلا... أن المجتمع المدنى يقوم بدوره كل واحد معاه عربية لو عنده ساعة فاضية واحدة بس في الأسبوع عمل فيها كده... اكيد هنواجه جشع التاكسيات والمواصلات. مش لازم نستنى الحكومة تعملنا كل حاجة.. (إن الله لا يغير ما بقوم حتى يغيروا ما بأنفسهم).
وقال "وأكيد في نماذج إيجابية كتير زى المحترم ده في شتى المجالات. بس عشان النموذج ينتشر لازم نظهره ونبينه ونوريه للكل.. انا عن نفسى نزلت شكرته وحييته واستأذنته اصوره... ودعيتله أن ربنا يكثر من الإيجاليين أمثاله وإن يرزقه مثل ثوابهم"