شلاليت

رمضان كريم نفسى أفطر يوم بحبة لوز
أو حتى حبة بلح فيه النوى مش جوز
ما أنا برضه صايم ونفسى أصحى فى يوم ألاقى البيت ملان لحمة حمرا وبرتقان مع موز
مش برضه فيه ثورة قامت تعلن التغيير
قالت لنا ابشروا.. فوق للسماح نطير
وفات سنة ونص وإحنا لسه بنهاتى
وحلمنا لسه مش فاهمه ما لوش تفسير
يا ثورجية .. الغلابة البلد بتضيع
وكل واحد بيحلم يبقى باشا سريع
واللى مالوش فى السياسة ولقمته شغلاه
الكل دايس عليه.. وفيه نازل تقطيع
الثورة مش هيصة ومظاهرة وخطب وزعيق
الثورة فكر وإرادة بتطلب التحقيق
فيه ناس عشان الرغيف بتشوف هموم ياما
مش كل حبة بقى نلقى الطريق بيضيق
إتعلموا إزاى بقى الحلم يتحقق
لأن لخرس خلاص يا خلق راح ينطق
وبلاش بقى كلكم رؤساء على راسنا
واسمع كلامى.. اللى صابر بكرة راح يزهق
رمضان كريم ثورتك يا مصر مخنوقة
والثورجية فى وسط الهيصة مزنوقة
فيه ناس ماهش فاهمة ماشية ضد ثورتها
وناس بثورتها ضد الظلم محروقة!