ثورة نبي

مصر يا أمّه
يا اللي كنتِ ملَبِّسانى من زمن قفطان وعِمّه
يا اللي كنتِ معلّمانى ف ساعة الغُمّة استغمّى
يا اللي كنتِ بتجبرينى إنّى أحضنك وأجرى أستحمّى
يااللي كنتِ بتقتلى فيا الأمل بضمير وهِمّه
يا اللي كنتِ بتكسرينى ف لحظة الحسم المهمِّة
مصر يا إمامة الأئمة
مسلمين أو أهل ذمة
كلنا طالعين بنهتف عالسكك
من جيش لأمِّه
ضد غُمِّه
كلنا طالعين بنهتف ع السكك من جيش لشعب لناس أبيِّه
ضد كل اللي انحنى وباع القضية
كلنا طالعين بنهتف:
جمهوريه.. جمهوريه
كلنا طالعين محرَّكنا الحماس ع السمسمية
كلنا طالعين عشانك بالزلط والمدفعية
بالقلوب الدافيه والجتت العفيّة
كل واحد فينا فارس
كلنا مش ثوْرَجيه
إحنا أولاد الطُرح والجلابيّه أم الكِمَام
إحنا أولاد بيرم التونسى وجاهين والشيخ إمام
إحنا أولاد البيوت العتمة واقفاص الحمام
إحنا أولاد المزارع والمصانع
إحنا أولاد الكنايس والجوامع
إحنا جيش الانتقام
إحنا طلق الثورة في أولاد الحرام
إحنا سيف ومسلّه ومشَنّة سهام
وإحنا قطَّاع الطرق وإحنا السلام
وإحنا بركان الغضب ساعة الصيام
وإحنا أحلامك وطيفك في المنام
مصر يا مراية الكلام الحلو
يا عشوش اليمام
اللي مات في الثورة عايش
بس واقف في الأمام
واللي عاش للثورة بيؤم القيام
واللي نادي بثورة شد لنا الحزام
واللي قام بالثورة..
ناس متعلمة ومن غير علام
يعنى ثورة شعب بيحب النظام
شعب بيؤدى التمام لتراب بلاده
شعب بيحرر ولاده
شعب بيبرّر حياده
شعب بيدرب جياده على العناد
"مصر يا أمَّ البلاد"
يا أم طاسه وقله وإشارة حداد
يا أم شُومه وفُلّه وعروق امتداد
اللي قام بالثورة واد بيشد واد
اللي قام بالثورة شعب بيبتسم ساعة الجهاد
شعب واقف يدعى ع النمرود وعاد
يعنى ثورة شعب كاره للموساد
شعب كاره..
للحياد المُر ولزيف الحقيقة
شعب عاشق..
راح يقدم روحه ويفادى العشيقة
شعب فجَّر ثورته يولَّع حريقه
شعب ما اتأخرش كَسْر من الدقيقة
من سُعاة القصر..
لشيوخ الطريقة
طالعه أمتنا العتيقة
وعامله صُوله وصَولجان
بالملاية اللف واليشمك وكيس البرتقان
طالعه فلاحه بغلق من غير ودان
طالعه دلاله بحلق وبديل حصان
طالعه أمتنا العتيقة تؤمنا ف وسط الميدان
طالعه رابطه الراية وصمام الأمان
طالعه بتسلحنا..
بسيوف الإيمان والصبر والعهد الجديد
طالعه لأجل تحنِّى مصر الطيِّبة بدم الشهيد
طالعة تهتف بالجريد للنصر والشعب العنيد
طالعة م الزنزانة
كاسره القيد وقضبانها الحديد
طالعة م الزنزانة
تهتف عيد وعاده
مصر واقفة تباهى بولادها السِّيادة
بس ليه ما اتمخضتش
بصوت يهز المنطقة قبل الولادة؟!
مصر يا سكر زيادة
قلبي مخنوق م البلادة والانحطاط
قلبي مخنوق م الوجع والذل لجام السكات
قلبي مخنوق
من وشوش الأنتيكات التايهه في وشوش البنات
م الحاجات الدايره بتدوس ع الحاجات
من رصاص الموت وصمت الدبابات
م الجينات الخايفة وصمود الجينات
كلنا واقفين على حدود الحارات نهتف بقوِّه
مصر يا أرض النبوة
يا اللي واقفة معانا ضدالفتْوَنه وظلم الفتوّه
مصر يا أم النوَّه..
أجمد - م - المروِّة و - م- الكلاب
إحنا طين الأرض والطوب والتراب
إحنا ريحة الورد وسطور الكتاب
إحنا طرحه ولاسَه وشويِّةْ تِيَاب
إحنا ناب الحق وسنان الحساب
مصر يا اللي بتضحكى خلف الحجابة
من غير حجابه
ثورتك..
ثورة وطن ضدالديابة
ثورتك..
ثورة وتر وقصيده وحكمدار نيابة
ثورتك..
ثورة ملايكه وخلق واقفين للعصابة
ثورتك..
ثورة نبى وثورة غلابة