ديالوج

بعد تسليم السلطة رسميا إلى رئيس مدنى منتخب بإرادة جماهيرية واسعة وغير مسبوقة.. التقى العسكرى بالمدنى على لقمة وعيش وملح ودار بينما الحوار التالي:
العسكري: كدة عدانى العيب وسلطتك فى إيدك وجمهوريتك معاك.. تمام يا عم؟
المدني: يا سيدى تشكر.. بس انت نسيت تاخد الإعلان الدستورى ده اللى وقع منك!.
العسكري: يعنى معقول بعد الحب ده كله.. نزعل من بعض عشان إعلان دستورى عملناه بحسن نية لأن الضرورة فرضت كده ولازم الأمور تمشي.
المدني: الشعب بيقول فى الميدان يسقط الإعلان.
العسكري: مش احنا اتفقنا على احترام القانون.
المدني: احترمته ورحت المحكمة الدستورية وحلفت هناك وقلت بلاش احط العقدة فى المنشار.. وعلى فكرة بقي.. أنا لو عديت الشارع بتاع المحكمة.. كنت حلفت اليمين فى مستشفى المعادي.
العسكري: يا مدنى باشا.. أنت حلفت بدل اليمين تلاتة .
المدني: وفكرت وحياتك احلف 58 مليون مرة.
العسكري: والله دى حاجه ترجع لسيادتك.
المدني: وعلى كل حال أنا شكرت وقدمت التحية الواجبة.
العسكري: بس ينفع سيادتك واحنا داخلين جامعة القاهرة نلاقى شلة تقول: يسقط حكم العسكر!.. هو فين..؟ وبعدين احنا جاين نهنى ونبارك.
المدني: أنا رديتها فى الها يكستب وأعلنت إنى ناوى تكريمكم.
العسكري: أن شا لله ما حدش يهتف تانى ضد العسكر.
المدني: هاتولى مجلس الشعب وأنا اخليهم يسكتوا.
العسكري: ياباشا ده حكم قضائى واحنا المفروض دولة مؤسسات!!
المدني: على عينى وراسي.. بس أنا وعدت الناس فى الميدان ولازم أكون قد كلمتي
العسكري: ما تخلينا ناخدها على الهادى والأمور تمشى واحدة واحدة!
المدني: والناس أقول لهم إيه!
العسكري: سيادتك لا تقول ولا تعيد
المدني: أمال أعمل إيه؟
العسكري: تمارس السلطات اللى فى يدك
المدني: سلطات إيه!
العسكري: اللى حضرتك واخدة .. من شوية
المدني: أنا فعلا اخدتها من شوية وحطتها هنا بورقتها عشان أخدها وأنا ماشى ما عرفش مين أخدها
العسكري: يعنى حد سرقها؟!
المدني: أمال راحت فين؟
العسكري: يمكن سبقت سيادتك على قصر الرياسة!