شلاليت

عمك شنطح.. جالك ينطح.. تّديلُه أيه؟
أدِّيُله مركز.. فيه يتمركز.. والخير فيه
أصل الحاجة ماهش محتاجة
تسكت بعد الثورة عليه
عمك شنطح قايم قاعد كدا محتاس
كل شوية عامل فيها زعيم حساس
ومَّا بنكشف أمره بيهرب
ويقف يخطب بين الناس
عمك شنطح له هَتِّيفَه ما بينَّا كتير
كل شوية واقفة تصوصو كالعصافير
وإن قلنا لهم كل شوية قلبتوا دماغنا
يطلع شنطح ويقول د أحنا بتوع تغيير
إحنا شبعنا ياشنطح منك.. من أحوالك
وإن مارحلتش من قدامنا.. طوِّل بالك
بكره حتندم إلحق نفسك إوعي تفكر
إن الدنيا حتفضل تسمع كدا موالك
بطل تخطب كل شوية خطبه طويلة
تشطح تنطح والحالة تفضل زي النيلة
إنت مفكر إن الدنيا كلام في كلام
لأ يامعلم يظهر إنك في التعسيلة
أنا حذرتك وإنت الجاني عليَّه ياشنطح
كل شوية عمال تخطب فينا وتنطح
إنت مفكر إن كلامك ريَّح بالنا
أصل أنا خايف بعد دا كُلُه كيلنا حيطفح