اللى بنى مصر

الليّ بني مصر متغرّب بعيد ع النيل
عشان ما تفضل بلاده تنوّر القناديل
دي الغُرْبهَ للأنْبيَا وللبشر صَعْبَه
وأرضنا الليّ رعتْنَا م الأزل.. كعبه
مشدوده ليها عُيوننا بالخيوط النور
تشدِّنا.. نشدَّها ولجلها بندُور
رايحين نجيب الزاد
وبنبعته لولاد
سيدْنا إبراهيم ما خِطِي لما سعي للزاد
كل السياسة كَيَاسَة ومضيعة للوقت
جرانين بتكتب يوماتي- أمَّة متَّحدة-
ليها المصير مشتركْ
وكل شيء في بدنها للأبد مشترك
جرانين بتكتب وأقلامها ما لفِّيتشي
ما اتغرَّبيتشي ما سألتشي ما عرفتشي
لحد إمتي راحا نخبِّي علي داءنا؟
مِتخبِّي بيننا وحافظه صم أعداءنا؟
مين اللي نام ع الحقيقة لما صارت وحش؟
تِهْتك في توب سرنا وبعيد تفرَّقنا.
وهو يعني لابد ما العداوة تسود؟
وحد يخبط دماغنا أو يمزقنا؟
عشان يفوقنا؟
سيدنا إبراهيم ما خِطِي لما جمع عزوته
علشان ما يبقي لحياتنا بعدها.. معني