قلب الياسمين

قراطين أرض..
ونخلتين قريبين من بعض..
وجاموسة..
وديك يدن..
وفرخة تبيض..
وبيت من طين بعيد..
بعيد فى الخلا..
يبعد عن القرف
مسافة ميت سنة بالطيارة..
ومفيش الصبح.. قهوة
ولا سيجارة..
ولا تليفون..
ولا ساعة..
ولا نشرة أخبار..
ولا جرانين..
ومفيش سقف
بينى وبين السما..
أتلف ف روحى وأنام
ده إن نمت..
وحوض ياسمين
يفكرنى إن فى يوم م الأيام
عشقت..
وسمعت أحلى غنا..
كلام طازة بنار الفرن..
وبطاقة شخصية..
مش مكتوب فيها
لا وظيفة..
ولا حالة اجتماعية..
ولا عنوان..
ولا ديانة..
ولا سن..
وضحكة من القلب سهلة
تطلع بالراحة ترن..
بيت بسيط..
مش مخنوق زى علب الكبريت..
وكلب وافى..
بديل عن كل اللى راحوا
م الأصحاب
يحمينى لو قرب م الباب عفاريت..
ووصية اكتبها واسيبها فى عش العصافير
إن مت..
دلوقتى أو بعد حين..
أمانة يا طير
تدفنى فى قلب الياسمين..