أنا الصعلوك

وأنا المملوك ف دواوينك
وأنا المفروم بدون ديه
أنا إللى كرهت أحلامى
وأقل ما فيها مش ليا
ومتشعبط ف خيط مقطوع
أنا مغصوب يوماتى أركع
عشان ضهرى انحنى م الجوع
وأنا المطلوب عشان أدفع
تمن حقى إللى كان مشروع
أنا حسبة ف دفتر صبر
وسجل الأمانى بعيد
يا دوب تمنى تذكرة للقطر
وبرخص كل يوم ما بزيد
وأنا إللى رفضنى حتى القبر
عشان طول عمرى ساقط قيد
أنا دمغة على ورقك
وردك ليا طول عمرك
بأن مواردى محدودة
وحاسبة عليا أنفاسى
ف كل دفاترك السودة
أنا ضل ف خيال صورة
بيتكمل بها الفتارين
يوماتى بأعلن العصيان
على شرعك ودستورك
ويوم ما ألقى بصيص لنور
بكون الصفر ف طابورك
ومش عارف أكون جاحد
وأكون عاصى على دينك
وده ذنبى وده إثمى
يا مخلوقة ف تكوينى
تكون روحى فدا طينك
وكل جروحى بتدينك