إبراهيم سعيد يكشف سر طرده من الفريق القومي

كشف إبراهيم سعيد، لاعب نادي الأهلي والزمالك السابق، عن سر طرد مدرب المنتخب القومي "كابتن الجوهري" له من معسكر المنتخب.
وسرد إبراهيم سعيد مواقفه مع الراحل الجوهري بالفريق القومي، فكتب عدة تغريدات على تويتر قال فيها: "أنا كنت بعمل مصايب سودا آه والله".
وأضاف: "الله يرحمه كابتن محمود الجوهري كان عامل معسكر في فندق نحو 15 يوم، وكان رافض الوجبات في الغرف، حظي الحلو الغرفة إللي جنبي عريس وعروسة جدد، "وفجأة آه والله بجد لقيت الباب بيخبط قمت أشوف مين معسكر بقى".
وتابع: "لقيت الروم سيرفيس واقف وجنبه عربية عليها فاكهة وسمك وجمبري وشوربة حاجة ولا في الخيال، قلت له تحت أمرك وبيدخل الأكل في الأوضة، قال لي مش حضرتك العريس قلت له آه.. قاللي ألف مبروك".
وقال: "قمت مكلم اللعيبة من غير أسامي قلت لهم عازمكم على أكلة سمك.. وماحدش تردد بصراحة"، وأضاف "الكل أكل وراح غرفته بعديها بساعتين جالي نفس الشخص قال لي الأكل جاه غلط قلت له يا راجل وقال لي العريس عامل مشكلة في الفندق قال لي ممكن الأكل، هو خد الأطباق بس والأكل بح، والفندق اتقلب والعريس والعروسة نزلوا الريسيبشن كان يوم طين وراحوا اشتكوا للكابتن جوهري".
وتابع: "عرفت أن كابتن جوهري طالع لي الأوضة قفلت على نفسي بالمفتاح، وطالع بقى متعصب ويخبط عليا، وأنا مش عايز أفتح الباب قام كاسر الباب برجله، قمت داخل الحمام وقافل على نفسي ويخبط ومش بفتح قال لي يا ابني ارحم.. أمي الفندق كده هيتكسر".
وأكد "قال لي طيب خد شنطتك وامشي من المعسكر قلت له كل ده عشان أكلة سمك.. ما اللعيبة أكلت قالوا له ده قال إنه عازمنا، المهم مشيت وتاني يوم صالحونا على بعض، وهو كان طيب بصراحة الله يرحمه ويغفر له، وتاني يوم قفشني وأنا بشيش.. كنت أنا وميدو وأحمد صلاح حسني".
وقال: "على فكرة أنا حياتي كانت برة الملعب مغامرات وضحك بس جوة الملعب كان شيء مختلف تماما، وكله عارف الحكم عليا كان خارج الملعب مش جوة الملعب".