ديالوج

samirelgamel@yahoo.com
هذه لحظة فارقة.. حيث التقت العزيمة مع الهزيمة وجها لوجه فى مشهد نادراً ما يتكرر فى حياة الأمم والشعوب.. وفى مصر المحروسة جرى.. ويجرى ما هو أكثر منه.. من الأعاجيب
العزيمة: مالك ياهزيمة هانم دبلانة وعدمانة وحالك ما يعلم بيه إلا ربنا؟!.
الهزيمة: المثل بيقول اللى مايشوفش من الغربال يبقى أعمى!!.
العزيمة: ده كلام قديم قوى بيفكرنى بوابور الجاز؟!.
الهزيمة: وإيه الجديد ياشملولة؟.. إننا رجعنا تانى نلف وندور حول نفسنا.. وكأنك يا أبو زيد ماغزيت!.
العزيمة: خلينا نبص لقدام يا أختي.. وبلاش نتكلم فى الماضى على رأى سيادة اللوا عمرو دياب!.
الهزيمة: يعنى اللى فات ننساه!!.
العزيمة: النسيان نعمة.
الهزيمة: لكن من فات قديمه تاه.
العزيمة: يعنى ترجع ريما لعادتها السخيفة والقديمة.. وكأنك ياثورة لا رحتى ولا جيتي!.
الهزيمة: خلاص خلينا نقعد ونصرخ ونلطم لغاية ما تخرب!.
العزيمة: تاني.. ماخربوها ونهبوها.. وسابوها على المحارة!.
الهزيمة: أنتى متأكدة أن اسمك عزيمة!.
العزيمة: طبعاً.
الهزيمة: بأمارة إيه!.
العزيمة: محدش هيقدر يرجع عقارب الساعة للخلف!.
الهزيمة: حلو امال حضرتك بتهرى وتنكتى ليه!.
العزيمة: عايزة الدنيا تبقى صح.. زهقنا لف ودوران ونصب واحتيال باسم الشعب والديمقراطية.
الهزيمة: تقصدى إيه!.
العزيمة: الثورة مستمرة وحياة غلاوتك.
الهزيمة: انتى بتهزري.. يعنى إيه ثورة مستمرة امال البلد تنهض أمتى؟ وتنتج أمتى؟ وتتقدم أمتى؟.
العزيمة: الأيام جاية كتير.. والشاطر اللى يضحك فى الآخر.
الهزيمة: خلى بالك انتى كده مستفزة وكأنك بتقولى جر شكل!!.
العزيمة: أنا اسمي العزيمة وما اعرفش الهزيمة مهما شفت!.
الهزيمة: ده تحدى بقى!.
العزيمة: لا سمح الله.. لكن بكرة الفاتورة تطلع وكل واحد يدفع حسابه.. وطره لاند موجودة!!