الشاطر ل «سطوطة» : أنا مصر ..ومصر أنا

درب الفشارين نسخة من مصر المحروسة .. فيها العالم والعابد.. «أبو دقن» وأبو سكسوكة وأرباب «التاتو» .. الليبرالى والمتأسلم والمستسلم.. البيه والبواب.. الدكتور والجزار والشاعر والفاجر وابن السبيل.. وأحمد ومنى ومينا وسلسبيل.. زورونا تجدوا ما يسركم، لكنكم أبدا لن تجدوا الصادق... فهذه المساحة ممنوعة إلا على أحفاد أبو لمعة الأصلى.
يستضيفهم : حسن شاهين
بعد أن أنهيت زيارتى للصديق الدكتور محمد بديع, وأثناء خروجى من مكتبه بالمقطم ,إذ بى أصطدم بعريض المنكبين طويل الاذنين المدعو خيرت الشاطر, الذى قال لى: أهلا سطوطة هانم .. كنتى بتعملى إيه مع فضيلة المرشد ؟! .. قلت : لا تسألوا عن أشياء إن تبد لكم تسؤكم ! .. قال: يعنى إيه ياولية الكلام ده ؟ .. قلت : اتلم ياشاطر وماتقولش ولية .. دا انت لسه كنت بتقول لى ياهانم .. ولا انت هتعمل معايا زى ما عملت مع الشعب .. فضلت تتمسكن لغاية ماتمكنتوا من الحكم ..ومافيش حد بقى مالى عينك وطايح فى البشر يمين وشمال ..
انتفخت أوداج الشاطر وأخذ الشرر يتطاير من عينيه..وقال: أستطيع أن أمحوك من الوجود انت وكل الفشارين امثالك .. .. قلت : طبعا .. ومن غير ما تظهر فى الصورة .. كفاية انك تجتمع بأولاد ابو اسماعيل وهما هيعملوا الواجب ..انت حرضتهم على احراق مقر حزب الوفد وجريدته.. اسمع ايها الشاطر .. مش كل الطير اللى يتاكل لحمه .. فوق لنفسك وشوف انت بتكلم مين .. دا انا سطوطة الفنجرى علي سن ورمح ..كبيرة سيدات الفشارين فى بر مصر والعالم العربى وفرنسا وأمريكا اللاتينية واستراليا كمان .. وسوف أعود للمرشد وأبلغه بما تقول ليعلمك كيف تخاطب من جاءوا بك وبرئيسك للحكم عن طريق علاقاتهم ..وبعد توسل مرسى وبديع لكبيرنا أبو طقة ..
أطلق الشاطر ضحكة مجلجلة..(دي غير الحق ابلج والباطل لجلج ).. وقال : مرشد إيه وبتاع إيه أيتها المجنونة .. أنا هنا العقل المدبر والجيب الممول ..والمرشد هذا يأتمر بأمرى ..ورئيسك كان يوما استبنا لى وأنا الذى صنعته رئيسا كى ينفذ تعليماتى بالحرف الواحد ..وأنا اخترته من بين كل الإخوان لأنه اكثرهم طاعة لى وليس لأنه اكثرهم نجومية ولاجمال ولاحتى ذكاء ..وطبعا انتم سيد العارفين.. وأنا الذى وضعت الدستور على طريقتى لأتمكن من أخونة البلد وبعدها سوف أغزو العالم اجمع.. أيتها المخرفة .. الكل هنا طوع امرى ورهن اشارتي ..فأنا مصر ومصر أنا ..
قلت : عند أم للى ياللى ..سايباك تتكلم وأقول لنفسي يمكن تعقل وتوزن كلامك لكن مافيش فايدة.. كلكم قطعية واحدة.. انت فاكر ان السلفيين والجماعات إياها هيسيبوك تطيح كده .. دول بس بياخدوك على قد عقلك لغاية ما البلد تتظبط (اسلامى).. وبعد كده هيظبطوك انت والاستبن ..
ارتدي الشاطر الوش الخشب..وقال : لأنك لاتعلمين أن كل تلك الطوائف ماهى إلا أجنحة للإخوان في الأصل .. فهم يأتمرون بأمرنا.. وكنا نعطيهم الأوامر بتنفيذ عمليات ارهابية في ايام النظام السابق ..وكنا نمولها ..ثم يعلنون انهم الذين يتبنون هذه العمليات .. بعيدا عنا .. وأبو إسماعيل وأولاده جناح من الإخوان.. والظواهرى والمرحوم اسامة بن لادن اخوان ..حتي معارضينا.. نصفهم اخوان والنصف الآخر تحت السيطرة ..وابو الفتوح خير دليل ويمكنه أن يشرح لك هذا اذا كنت لم تستوعبى بعد ..
قلت : على فكرة.. انت تنفع تشتغل معانا فى درب الفشارين .. لأنك بتفشر الفشرة وتصدق نفسك ..واحنا عملناها قبلك ياعم الشاطر .. .. قال : أنا لن أؤذيكى الآن ..فلم يحن بعد وقت تصفية الحسابات.. لكن عندما يأتى هذا الوقت سوف اقطع رقاب كل معارضينا ..والقوائم السوداء جاهزة ..واسمك يا سطوطة مكتوب..
بصراحة اشفقت علي الشاطر وأمثاله..
قلت : إذن هى الحرب ياعم الشاطر.. وسوف نرى على من ستدور الدوائر .. فكما جاءت بكم امريكا بوساطة منا كى نتخلص من شفيق ونظامه القديم.. سوف تطيح بكم امريكا بوساطة منا أيضا ..كى نريح الشعب منكم ومن بلاويكم!!