رسالة من مواطن للرئيس السيسي

أرسل المواطن «هلال حلمي محمود بدر»، عبر خدمة «واتس آب فيتو»، رسالة إلى الرئيس عبد الفتاح السيسي.
وقال «هلال» في رسالته: «إلى الرئيس السيسي لأنه الوحيد من يهمة أمر المواطن المصري، سيدي الرئيس هو ينفع سيادتك تحارب لوحدك؟، أيوه سيادتك بتحارب لوحدك، سيدي أحببناك وقت أن نصرتنا، أيدناك وقت أن شعرنا بإخلاصك، بعد سنة من تولي سيادتك للحكم ماذا حدث لي أنا المواطن.. لا جديد، فقر مرض جهل ظلم ضياع».
يا سيادة الرئيس مصر تحتاج 90 مليون سيسي في إخلاصك وجهدك وفكرك وإصرارك، ووطنيتك وحبك للوطن والمواطن، دبرها بقى ياسيادة الرئيس.
أين الشباب ياريس ؟؟؟؟
إلى الآن الدولة لا تحترمنا ولا تقدر دورنا مع أنكم اعترفتم في 25 يناير و6/30 بدورنا، طيب استفادتوا إيه مننا، طيب قدمتوا إيه لنا، التهميش واستكمال مسلسل الضياع وعدم التقدير.
ولك سيادة الرئيس، مادورنا في البلد، قلت لنا سيادتك دورنا البناء، طيب هو حد قال لنا تعالوا ابنوا واحنا قلنا لأ؟؟، طيب ولما جينا لكم وقلنا لكم احنا هنا عايزين نبني نشارك، ما كان منكم إلا التجاهل وقلتوا لنا في المشمش، طيب ياريس والله أنا بحب بلدي وبحبك وعايز أساعد في بناء بلدي وأساعد سيادتك.
طيب ياريس أعمل إية دلوقتي مديون، مهموم، مريض، عاطل، بس خلي بالك والله أنا كنت بره مصر مدير كبير، وناجح بس جيت استقر في بلدي واتجوز بقي، بس مش لاقين التقدير في بلدنا ليه، خسرت فلوسي وتداينت علشان في ناس كبيرة في البلد ميسمحوش للصغير يكبر ليه.
شوف ياريس عايز تعرف إحساس الغلابة اللي بيحبوك بجد وصدق، واللي بنوا آمالهم عليك، ومنتظرين ومعاك، روح المصالح الحكومية، وشوف الافتراء والذل، والبيروقراطية، إمبارح الراجل الغلبان في التأمينات بيقول كده ياسيسي ترضى لنا البهدلة كده مش قولت هنبني، وقلنا لك احنا معاك ووراك ونربط الحزام علشان بلدنا ولجل خاطرك، احنا عملنا وأنت معملتش، البيروقراطية ياريس، الفساد ياريس، الواسطة ياريس.
المواطن ياريس يفضل إنه ينام من غير عشا بس ينام بكرامة بس وصل الحال إنه نام من غير عشا وكمان من غير كرامة كمان، عملت إيه ياريس في غول الدروس الخصوصية، الفقر ياريس، التموين ممتاز الله يكرمك، وإهمال المستشفيات الحكومية، التعليم، الفقير ياريس ملوش حق في تعليم محترم.
ياريس أنا المواطن، أنا الترمومتر بتاع الحكومات، يعني أنا لو كويس تبقي الحكومة شغاله ولو مش كويس تبقي الحكومة مش شغاله.
احنا عارفين الحمل تقيل والهم كبير بس احنا قدمنا كل حاجة ماعتش عندنا حاجة تانية نقدمة والله، أنا الشرعية ياريس زي ما سيادتك قلت، طيب يرضيك الشرعية تتهان، وتتبهدل، وتتهمش.
دورنا كشباب ايه يا ريس نموت في الثورات بس، احترمونا قدرونا، الأمم تبني بسواعد وعقول الشباب مش بالموظف اللي هو مقصر ومرتشي ومهمل، طيب وتسمعنا ازاي يا ريس ونوصل لسيادتك ازاي لا وزير قابلنا ولا رئيس وزراء سمعنا طيب نعمل إيه، لنا الله.
يا ريس خدنا معاك نبني خلينا في ضهرك نساعدك أمانك وسندك والله احنا رجالة قوي بس حد يعبرنا ويوجهنا صح، وفي النهاية أنا مواطن مصري بحب بلدي وبحبك وأقدر جهدك، بس فات سنة يا ريس وحالي بصراحة ومتزعلشي مني أسوأ.
الشباب إما أن تجعله وقودا للبناء أو تتركه طاقة مهدرة، يا رب يا ريس تسمع صوت ولادك.
وتتيح «فيتو» لقرائها التواصل الدائم معها عبر كل وسائل الاتصال الممكنة للأجهزة المختلفة، وهي «واتس آب whatsapp، سكايب skype، فايبر viber، لاين line، بي بي إم BBM، وكيك kik»، وذلك عبر الرقم «01270709070».