"حس بينا يا مرسى".. قصيدة تسببت فى مطاردة 3 مدرسين لطالبة بالمحلة

طارد العاملون بمدرسة السيدة زينب الثانوية بنات بالمحلة الكبرى، صباح اليوم الأربعاء طالبتين تناولتاأ ثناء الإذاعة المدرسية بطابور الصباح إلقاء قصيدة مناهضة للدكتور محمد مرسى رئيس الجمهورية بعنوان "حس يا سيادة الرئيس بينا".
"فيما ألقت الطالبة الثانية فى فقرة أخبار اليوم مقالا صحفيا للكاتب علاء الأسوانى، يندد بحال الدولة فى عهد ولاية جماعة الإخوان المسلمين، الأمر الذى دفع عددا من المدرسين إلى الضغط على مديرة المدرسة فاعترضت على ذلك وأمرت بإحالة الأخصائية الاجتماعية المسئولة عن الصحافة المدرسية وتدعى داليا على والطالبتين إلى الشئون القانونية للتحقيق معهما.
قالت الطالبة سالى السيد هاشم، إن هناك عددا من مدرسى المدرسة أبرزهم محمد عواد مدرس اللغة الإنجليزية بذات المدرسة هاجمهم بسبب ميولهم السياسية قائلا لهم: "أنتم مش هتحرموا إلا لما أجيب لكم عيش وحلاوة"، لافتة إلى قلقهما وتخوفهما كطالبات لأن ما قيل لهم بمثابة تهديد وليس مزاحا.
وكشفت الطالبة سالى قاعود، أنها تعرضت هى وزميلتها للمطاردة من قبل ثلاثة مدرسين عقب إلقائهما للإذاعة المدرسية لمعاقبتهما والفتك بهما إلا أنهما تمكنتا من الهرولة بساحة المدرسة حتى وصلوا إلى غرفة الأخصائيين الاجتماعيين.
وأعلنت الطالبة قاعود أن ما حدث لها هى وزميلتها أمر لا يقبله عقل ولا قانون عقب ثورة 25 يناير، التى حققت المعجزات رافضة سياسة تكميم الأفواه وتحريم حرية الرأى والتعبير فى عهد الحرية والديمقراطية فى كل بقاع الدولة المصرية.
وجاءت نص القصيدة كالأتى:
نص القصيدة ...
حس
حس يا سيادة الريس بينا
حس بالنار اللي والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله ايه؟ لما يسأل جنابك علينا

حس
حس بشوارع مليها دم
حس بقهرة أب وأم
حس ببيوت جُواها هم
والقلوب مليها الغم
حس ببلد بتموت
وعز شبابها بيتسم

حس
حس بجدع عياله جاعت
نزل يوكلهم فكرامته اتباعت
اتسحل واتعرى في وسط حكومتك
وبعد ده كله حقوقه ضاعت




حس
ده أنا المصرى ابن البلد
حلمى في وسط الميدان اتولد
حلمي في بلدي تعلى لفوق
وحلمي قدامي اتعرى واتجلد

حس
يا سيادة الريس شرفك فين؟
لما اتعرى المصري الهمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا اسيبك تنهش
في لحم بلدي زي زمان

حس
ما أصلي خلاص م الموت معودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه م تقدر تنساه
الموت أب انكسر ظهره
ابنه كان ظهره وقواه
الموت يعني مستقبل بيموت ويضيع
وتموت أحلامك وياه

حس
حق اللي اتعرى يا ريس فين؟
ولا هو اللي عراه أصلا مين؟
اللي عراه ظلم وكدب
اللي عراه حكم مهين
اللي عراه ديابة ملهاش إحساس
اللي عراه كلاب مسعورين
اللي عراه سكوت.. اللي عراه جبروت
اللي عراه سلطة بتكسر عين

(حس)
ورسالتي أخيرة لنظام جبان
نظام فاسد ملوش عنوان
لو هموت
لو دمي منك يلاقي الجحود
وتهددني بسجن ظلام
ولا لوجوده أي وجود
... مش هتسكت فيا الصوت..
... مش هتسكت فيا الصوت ..