ديالوج

تستمد الأيام والشهور قيمتها من الأحداث التى تحفل بها.. وبذلك تدخل ذاكرة التاريخ وتعيش ضد النسيان.. وعلى مقهى «تعيش وتفتكر» التقى شهر يونيه مع أكتوبر وكان هذا الحوار الذى كاد أن يتحول الى مشاجرة حامية لولا تدخل أولاد الحلال:
أكتوبر: باقولك أيه ياكابتن يونيه انت مش عارف ان ده شهر النصر.. ووجودك هنا دلوقتى مش حلو!
يونيه: بلاش الغرور اللى انت فيه واتكلم على قدك!
أكتوبر: يا بنى أنا شهر العبور العظيم
يونيه: اذا كنت عندكم يا اولاد العرب شهر النكسة انا عند الصهاينة فرخة بكشك لانى شهر النصر الكاسح.
أكتوبر: مش مكسوف من نفسك؟!
يونيه: هو انا اللى كنت بحارب.
أكتوبر: جيش العرب يا فالح مادخلش الحرب من اصله سنة 76.
يونيه: خلاص نسميها مهزلة لا نكسة!
أكتوبر: بتهزر حضرتك.. لا تسميها حرب تحطيم الاسطورة للجيش الذى لايقهر؟!
يونيه: انت مالك منحاز للعرب كدة ليه احنا مواعيد والشعوب هى اللى بتكتب لنا العناوين.. وفيه مننا القبطى زى بابه وبشنس.. والشامى زى تشرين اول وحزيران والليبى لما عمل القذافى «تقويم خصوصي».
أكتوبر: عارف وانت كنت شهر التمور وانا شهر الماء وبعدين انا عارف كمان ان انت فرحان بشبابك ياجونيوس وهو ده معنى اسمك ياطايش.
يونيه: مقبول منك يا «اكتو» قصدى يارقم تمانية عند الرومان.
أكتوبر: متشكرين قوى على شوية المعلومات دي.. بالمناسبة.. تقدر تشترك مع الاستاذ جورج قرداحى فى برنامج من «سيربح المليون» يمكن تيجى معاك وتكسب.
يونيه: ياعم أكتوبر.. الناس اللى حاربت بعضها عملت اتفاقيات صلح مع بعضها انت شايل طاجن ستك ليه ومش طايقنى ليه واحنا اولاد سنة واحدة وانت زى اخويا الكبير.
أكتوبر: يا سيدى ده من ذوقك وأدبك.. لكن التطبيع اللى بتتكلم عنه ما حدش مقتنع بيه غير الاستاذ على سالم «الكاتب التطبيعي».
يونيه: أنت هتغلط ليه؟ ما تشوف اسرائيل فين.. والدول العربية بتاعتك كلها فين؟
أكتوبر: عندك حق.. كفاية ان إسرائيل تحت رعاية ماما امريكا.. لكن وحياة دقنك عمر اللى فات ما هيرجع تاني!
يونيه: ماشى ياعبدالمطلب.
أكتوبر: مش مصدق اسأل اخوك «يناير» وبالتحديد يوم «52» وانت هتعرف كل حاجة ياغشيم!