كنباوى وكنباوية.. حلقة رقم (20).. محو الأمية السياسية لنساء الحوارى الشعبية !!

عاد كنباوى من عمله منهكا خائر القوى، يبحث عن لقمة هنية وكوباية شاى وحمام دافئ وتعسيلة وبعض الهدوء والراحة والسكينة، فيفجع من أول دخوله الشقة ليشعر أنه قد أخطأ ودخل شقة أخرى غير شقته.. فإذا بحشد وجمع من النساء يجلسن فى كل بقعة بالشقة فلا يستطيع الدخول، فتلمحه كنباوية وهو يخرج من باب الشقة فتبادر بالنداء عليه راجية حشد النساء أن يفسحن له مكانا ليمر إلى الداخل..
يدخل كنباوى ويجلس بين النساء ليستطلع الموقف والأمر، فيعلم بعد قليل من الوقت أن كنباوية تقوم بإعطاء دروس فى محو الأمية السياسية لنساء الحوارى الشعبية فيجلس بينهن ويستمع لكنباوية.....
كنباوية: اسمعوا يا نسوان، أنا تعبت من المناهدة معاكم وصوتى راح.. حقول من تانى .. الإخوان ضحكوا علينا، الإخوان إيييييه؟ ضحكوا علينا وسرقوا الثورة ولاد الحرامية الشباب قام بيها واللى مات منه مات وهمه لهفوها على الجاهز دول أجبن من إنهم يقوموا بمظاهرة مش يقوموا بثورة واحنا صدقناهم لما قالوا قال الله وقال الرسول، دول لا يعرفوا الله ولا رسوله والدليل على كدة المحسوبية والوساطة اللى بتحصل فى البلد لتعيين الإخوان لبعضيها وقتل الثوار ناسين أن من ساعد فى جريمة قتل ولو بنصف كلمة جاء يوم القيامة مكتوب على جبهته يائسا من رحمة الله دول.. خونة قتلة وسفاحين لا ليهم ملة ولا دين فاهمين ولا نقول كمان؟
أم حسين: فاهمين
كنباوية: شاطرة يا ام حسين وازاى الواد حسين لسه مراته مطهقاه فى عشته؟
أم حسين: لأ يا اختى ما طلقها عمنول واتجوز واحدة تتحط على الجرح يطيب وبتسمع الكلام واهى حبلة فى شهرين.
كنباوية: والله العيال كبروكى يا ام حسين وحتبقى جدة
أم حسين: يا ستى يلا حسن الختام حناخد زماننا وزمن غيرنا
كنباوية: ربنا يديكى الصحة وطول العمر يا ام حسين ويفرحك بعيال ابنك وتعيشى لحد ما تشوفى ولاد ولادهم.
إحسان: طيب قوليلنا يا كنباوية.. مش احنا بلد ديمقراطى والديمقراطية دى كويسة واحنا اللى انتخبنا بسلامته فى الصندوق.. يعنى الراجل أبودقن ده اللى اسمه مرسى ماعليهوش لوم؟!
كنباوية: معاكى يا إحسان احنا اللى انتخبناه وكانت وكسة .. بس الراجل طلع فالصو عيرة برانى مايساويش تلاتة ابيض ولا حتى نص فرنك ..ده عبد المأمور ..المرشد يقوله يمين يبقى يمين يقوله شمال يبقى شمال.. إنمعه" !!
إحسان: يعنى إيه يا اختى الكلمة اللى انتى قولتيها دى؟
كنباوية: انمعة يعنى مالهوش رأى، معاكم معاكم عليكم عليكم وبعدين مش المشكلة فى الصندوق ماهتلر جه بالصندوق وأكيد انتوا عارفين هتلر عمل إيه فى ألمانيا وشعب ألمانيا بلاهم بعيد عن السامعين وده اللى المقندل بيعمله معانا دلوقتى بالينا وبيرازى فينا ومش عاوز يمشى، اتسعر ما هو بقى رئيس بعد ما كان حبسجى ورد سجون
فوزية: يعنى انتى عايزانا نعمل إيه دلوقتى يا كنباوية نروح نعمل توكيل للسيسى بحكم مصر؟
كنباوية: وماله مش حيخسر السيسى أحسن منهم الحرامية الحبسجية الكدابين الطماعين دول، وعيزاكم تنزلوا فى انتخابات البرلمان لما يتعمل تدوا صوتكم لأى واحد ان شاالله يكون فلول مش مهم حزب وطنى سابق مش مهم مسيحى أخونا برضة مش مهم المهم الإخوان ما ياخدوش ولا صوت غير أصوات ألاضيشهم فاهمين يانسوان ؟
النسوان: ايوة فاهمين يا كنباوية
أم ولاء: ندى صوتنا للسلفية وحزب النور؟
كنباوية: سلفية ايه ونور وميه ايه ما الاتنين زى بعض وانيل من بعض دول يتقال لهم يا نحلة لا تقرصينى ولا عايزة عسل منك.
فريدة: يبقى ننتخب الجبهة
كنباوية: ده لو قبلت تدخل الانتخابات يا فريدة وعايزة منكم كل واحدة ليها قريب مسافر تبلغه يعمل توكيل فى السفارة فى البلد اللى هو فيها للسيسى بحكم مصر
أم آية : وده حيفيد بحاجة يا كنباوية؟
كنباوية: طبعا حيفيد العاملين بالخارج 7 مليون لو 5 منهم بس عملوا توكيلات للسيسى السيسى ساعتها حيفكر بجد ويبقى هو أحسن من الحرامى ده مرسى ده 6 شهور كمان والبلد تولع أكتر ما هى والعة الراجل ماعندهوش أى رؤية الراجل بيسألوه ويقولوله مصر على وشك الإفلاس يرد ويقول لهم مستشهد بالقرآن 00 فى السماء رزقكم وما توعدون ...خلى المصريين ماشيين فى الشوارع بصين لفوق مستنيين السما تمطر فلوس .. الله يكون فى عونا منه ومن دروشته ده درويش مش رئيس فاهمين يانسوان؟
النسوان: فاهمين يا كبيرة
كنباوية: دلوقتى قبل ما انهى الدرس والحصة فيه واحدة فيكم عايزة تفهم حاجة مش فهماها أو عايزة تعرف حاجة مش عارفاها أو تسأل سؤال
النسوان: شكرا يا كبيرة العواف عليكى
كنباوية: الله يعافيكم يا نسوان ماتنسوش ميعادنا بعد بكرة الحصص يوم ويوم
..... وتنصرف جموع النساء وتنظر كنباوية لتجد كنباوى نائما على الكنبة وقد علا شخيره فتغطيه وتتركة نائما لإحساسها بأنه مرهق متعب.